काठमाडौँ । नेपाली टोलीका कप्तान रोहित पौडेलले आफ्नो टोलीका लागि टसले ठुलो अर्थ नराख्ने बताएका छन् । ‘टस ठुलो कुरा होइन, हामी पहिले ब्याटिङ गर्दै बढीभन्दा बढी रन बनाउन चाहन्छौ । अहिलेका लागि हाम्रो लक्ष्य यही हो,’ नेदरल्यान्ड्सले टस जितेर नेपाललाई पहिले ब्याटिङको निम्तो दिएपछि नेपाली टोलीका कप्तानले भने ।
उनले १० वर्षपछि आफूहरु विश्वकप मञ्चमा उभिएको बताउँदै सानैदेखि देशका लागि विश्वकप खेल्नु आफ्नो सपना भएको प्रतिक्रिया पनि दिएका छन् । नेपाल र नेदरल्यान्ड्सबिचको खेल अमेरिकाको डालासमा केही समयमा सुरु हुनेछ ।
खेल मंगलबार राति ९ः१५ बजे सुरु हुने भनिए पनि केही समयअघि भएको वर्षाका कारण आउट फिल्ड सुक्न समय लागेकाले खेलमा केही विलम्ब भएको हो । समूह ‘डी’ मा रहेको नेपाल र नेदरल्यान्ड्सले आफ्नो पहिलो खेल खेल्न लागेका हुन् ।
