काठमाडौँ । क्रिस्टियानो रोनाल्डोले युरोकप छनौट अन्तर्गतको अर्को खेल गुमाउने भएका छन् ।
गएराती सम्पन्न खेलमा पोर्चुगलको स्लोभाकियाविरुद्धको खेलमा रोनाल्डोले पहेलो कार्ड पाएसँगै लगातार दोस्रो खेलमा पहेलो कार्ड पाएका कारण सेप्टेम्बर १२ मा हुने लक्जेम्बर्गविरुद्धको खेल गुमाउने भएका हुन् ।
यस खेलमा क्रिस्टियानो रोनाल्डोले खेलको ६२औं मिनेटमा पहेलो कार्ड पाएका थिए । उनले गोलकिपरलाई फाउल गरेपछि पहेलो कार्ड पाएका थिए ।
उनले यसअघि आइसल्याण्डविरुद्धको खेलमा पनि पहेलो कार्ड पाएका थिए । सो खेलमा खेलको ८३औँ मिनेटमा रोनाल्डोले पहेलो कार्ड पाएका थिए । पोर्चुगलले सो खेल गत जुन २१ मा खेलेको थियो ।
पोर्चुगलले युरोकप छनौटमा आफ्नो विजयी यात्रालाई भने कायम राखेको छ । अहिलेसम्म पोर्चुगलको समुह जे मा ५ खेलमा १५ अंक भएको छ र समुहमा शिर्ष स्थानमा रहेको छ ।
