त्रिवि शिक्षण अस्पतालले एमाले उपाध्यक्ष सुवास नेम्वाङको मृत्युबारे आधिकारिक धारणा बाहिर ल्याएको छ ।
अस्पतालका निमित्त कार्यकारी निर्देशक डा सन्तकुमार दासले आज एक विज्ञप्ति जारी गर्दै अस्पताल ल्याइपुर्याउँदा नेम्वाङमा जीवनसम्बन्धी कुनै चाल नदिएको बताएका छन् ।
त्यसबखत उनको आँखाका नानीहरू फुलिसकेका र स्थिर रहेको अस्पतालले जनाएको छ ।
‘नेम्वाङलाई सोमवार राति १ः१५ बजे उपचारका लागि ल्याइएको थियो । जाँच गर्दा उहाँमा जीवनसम्बन्धी कुनै चाल नदेखिएको अवस्था थियो । आँखाको नानीहरू फुलिसकेका र स्थिर रहेको थियो,’ विज्ञप्तिमा भनिएको छ, ‘३५ मिनेटसम्म पनि सीपीआर गर्दा पनि जीवनसम्बन्धी कुनै संकेत नदेखिएकाले ३ बजे मृत घोषणा गरिएको थियो।’
प्रतिनिधिसभा सदस्यसमेत रहेका नेम्वाङको हृदयघातका कारण सोमवार राति झण्डै साढे २ बजेको समयमा निधन भएको एमालेका नेताहरूले लोकान्तरले आज बिहान बताएका थिए । यसैबीच, अस्पतालले आधिकारिक धारणा बाहिर ल्याएको हो ।उनी संविधानसभाका अध्यक्ष तथा प्रतिनिधिसभाका पूर्वसभामुखसमेत हुन् ।
