ओल्ड ट्राफोड । म्यानचेस्टर युनाइेटले ब्राइटनसँग घरेलु मैदानमै लज्जास्पद हार बेहोरेको छ । यो सिजन उत्कृष्ट प्रदर्शन गरिरहेको ब्राइटनले युनाइटेडलाई ३–१ गोलले हराएको हो ।
पहिलो हाफको २० औँ मिनेटमा नै ब्राइटनले ड्यानी वेल ब्याकको गोलमा अग्रता लिएको थियो । दोस्रो हाफमा पास्कल ग्रोस र सब्सटिट्युट जोआओ पेड्रोले गोल गर्दै ब्राइटनले अग्रता फराकिलो बनाए ।
ह्यानिबल मजेब्रीले युनाइटेडका लागि पहिलो गोल गर्दै केही आशा दिलाए पनि उनको गोल सान्त्वना मात्र बन्न पुग्यो । पराजयपछि युनाइटेडका समर्थकहरू म्यानेजर एरिक टेन हागमाथि खनिएका थिए ।
टेन हागको टोलीले पछिल्ला ४ खेलमा १० गोल खाएको छ । युनाइटेडले लगातार ४ लिग खेलमा एकभन्दा बढी गोल खाएको सन् १९७९ पछि पहिलोपटक हो ।
पराजयसँगै युनाइटेड लिगको १२ औँ स्थानमा खस्किएको छ । ५ खेलबाट युनाइटेडको मात्र ६ अंक रहेको छ । उता ब्राइटन भने पाँच खेलमा चौथो जीत हासिल गर्दै लिगको तेस्रो स्थानमा उक्लिएको छ ।
