काठमाडौँ । अफगानिस्तानका क्रिकेटर नवीन उल हकले आगामी विश्वकप लगत्तै एकदिवसीय अन्तर्राष्ट्रिय क्रिकेटबाट सन्न्यास लिने घोषणा गरेका छन् । आईसीसी एकदिवसीय विश्वकप अक्टोबर ५ देखि नोभेम्बर १९ सम्म भारतमा आयोजना हुँदै छ ।
दायाँ हाते मध्यम तेज गतिका बलर नवीन उह हकले २४ वर्षको उमेरमै एकदिवसीय अन्तर्राष्ट्रिय क्रिकेटबाट सन्न्यास लिने घोषणा गरेका हुन् । विश्वकपको १३औँ संस्करणका लागि घोषित अफगानिस्तानको टोलीमा उनलाई पनि समावेश गरिएको छ ।
नवीन उल हकलाई विश्वकपका लागि अफगानिस्तानको टोलीमा पनि अप्रत्याशित रूपमा समावेश गरिएको थियो । उनले दुई वर्षभन्दा लामो समयदेखि एकदिवसीय अन्तर्राष्ट्रिय क्रिकेट खेलेका थिएनन् । उनले पछिल्लो पटक सन् २०२१ को जनवरी २६ मा आयरल्यान्डविरुद्ध अन्तिम एकदिवसीय खेल खेलेका थिए ।
नवीन उल हकले हालसम्म अफगानिस्तानका लागि सातवटा एकदिवसीय अन्तर्राष्ट्रिय प्रतियोगिता मात्र खेलेका छन् । उनले सात एकदिवसीय खेलमा १४ विकेट लिएका छन् । टी—२० अन्तर्राष्ट्रिय प्रतियोगितामा भने उनले नियमित रूपमा सहभागिता जनाउँदै आएका छन् ।
उनले सामाजिक सञ्जालमार्फत आफ्नो सन्न्यासको निर्णय सार्वजनिक गरेका हुन् । उनले आफ्ना समर्थकलाई धन्यावाद पनि दिएका छन् ।
