बैंगलोर । आईसीसी विश्वकप क्रिकेटमा आज श्रीलंकाले न्युजिल्यान्डको सामना गर्नेछ । बैंगलोरको एम चिन्नस्वामी रंगशालामा यो खेल दिउँसो सवा २ बजे सुरु हुनेछ।
विश्वकपको सेमिफाइनल पुग्न न्युजिल्यान्डका लागि यो खेल निकै महत्वपूर्ण भएकाले उसलाई जित्नै पर्ने दबाब छ। एक हारले उसको सेमिफाइनल सम्भावना समाप्त हुनेछ।
पछिल्लो समय न्युजिल्यान्डको खेल मौसमले प्रभावित बनेपछि २५ ओभरमा नै पाकिस्तानले जित दर्ता गरेको थियो। पाकिस्तानविरुद्ध चार सय रन बनाए पनि न्युजिल्यान्ड पराजित भएको थियो। त्यसैले खेलमा मात्र होइन आज न्युजिल्यान्ड मौसमसँग पनि सतर्क भएर खेल्नु पर्नेछ।
न्युजिल्यान्डको ब्याटिङ ठिकठाक भए पनि बलिङ युनिटले भने लगातार उत्कृष्ट प्रदर्शन गर्न सकिरहेको छैन । ट्रेन्ट बोल्ट र टिम साउथीजस्ता खेलाडीले एकै प्रकारको खेल प्रस्तुत गरिरहेका छन्।
यता श्रीलंका भने अघिल्लो खेलमा बंगलादेशसँग हार ब्यहोरेर बाहिरिसकेको छ। श्रीलंकाले जारी प्रतियोगितामा आशातित प्रदर्शन गर्न सकेको छैन। भ्रष्टाचार र अनियमितता गरेको भन्दै त्यहाँको सरकारले श्रीलंकाको बोर्डलाई पनि निलम्बन गरिसकेको छ।
श्रीलंकाका समर्थकले खेलाडीको पनि आलोचना गर्दै आएका छन्। अहिले अंक तालिकामा समान आठ अंक भएका न्युजिल्यान्डसँगै पाकिस्तान र अफगानिस्तान पनि छन्। नेटरनरेटको आधारमा न्युजिल्यान्ड सबैभन्दा अघि छ । पाकिस्तान र अफगानिस्तान दोस्रो र तेस्रो स्थानमा छन्। पाकिस्तान र अफगानिस्तानले पनि आउँदो खेलमा जित दर्ता गरे अन्तिम चारमा जाने सम्भावना रहन्छ।
