अलराउन्डर इन्दु वर्मा नेपाली महिला राष्ट्रिय क्रिकेट टोलीको कप्तान नियुक्त भएकी छिन् ।
नेपाल क्रिकेट संघ (क्यान) ले विहिबार हङकङ टुरको लागि घोषणा गरेको टोलीमा इन्दुलाई कप्तानको जिम्मेवारी दिइएको हो । यसअघि टोलीको कप्तान रहेकी रुविना टोलीको सदस्य रहँदा बायाँ हाते ब्याटर विन्दु रावललाई उपकप्तान बनाइएको छ । पुर्व उपकप्तान सीता राना मगर पनि टोलीमा सदस्य छिन् । टोलीमा कन्चन श्रेष्ठ, सोमु विष्ट र सोनी पाख्रिन नयाँ खेलाडी रहेका छन् ।
क्यानका सचिव पारस खड्काले इन्दुलाई यस प्रतियोगिताका लागि कप्तान नियुक्त गरिएको जानकारी हाम्रो खेलकुदलाई दिए । ‘इन्दुलाई यस प्रतियोगितामा पहिलो पटक कप्तानको जिम्मेवारी दिएका छौँ । छनोट समिति र क्रिकेट म्यानेजरबाट नै नेतृत्व परिवर्तनको लागि सिफारिस भएकाले हामीले बोर्ड बैठकबाट नै यो निर्णय लिएका हौं । रुविना खेलाडीको रुपमा अझैपनि प्रदर्शन गर्न सक्ने खेलाडी हो, त्यसैले कप्तानमा मात्र परिवर्तन गरिएको हो,’ खड्काले भने ।
‘हामीले यसलाई दिर्घकालीन रुपमा पनि हेर्नुपर्छ । महिला क्रिकेटले निकै सम्भावना बोकेको छ र यस प्रतियोगितामा इन्दुलाई जिम्मेवारी दिएका छौं,’ उनले थपे ।
नेपालले हङकङमा चार देश सम्मिलित टि२० सिरिज खेल्दैछ । उक्त सिरिजमा नेपालसँगै तान्जानिया, जापान र हङकङले खेल्नेछन् ।
नेपाली टोली:
इन्दु वर्मा (कप्तान), विन्दु रावल (उपकप्तान), रुविना क्षेत्री, सिता रानामगर, अश्मिना कर्मचार्य, काजोल श्रेष्ठ, रोमा थापा, संगीता राई, सम्झना खड्का, खुसी डंगोल, पुजा महतो, कन्चन श्रेष्ठ, सोमु विष्ट, सोनी पाख्रिन
