इस्लामाबाद । गत अक्टोबर ७ मा हमासले इजरायलमा गरेको आक्रमणपछि सुरु भएको युद्धमा हालसम्म १४ हजारभन्दा बढी प्यालेस्टिनी नागरिक मारिएका छन् । इजरायलमा करिब १२ सय मानिसको पनि मृत्यु भएको छ ।
खेलकुद र मनोरञ्जनदेखि लिएर अन्य धेरै क्षेत्रका सेलिब्रेटीहरूले सामाजिक सञ्जालमा प्यालेस्टाइनको पक्षमा समर्थन जनाएका छन् । यसका कारण धेरै सेलिब्रेटीहरूले आफ्नो व्यावसायिक जीवनमा आर्थिक नोक्सान पनि बेहोरिरहेका छन् । धेरै अभिनेता र खेलाडीहरूले उनीहरूको सम्झौता रद्द गर्ने जस्ता कार्यहरूको सामना गरिरहेका छन्।
यस सूचीमा पाकिस्तानी क्रिकेटर आजम खानको नाम पनि थपिएको छ । उनले पाकिस्तानमा भइरहेको राष्ट्रिय क्रिकेट लिगको क्रममा आफ्नो ब्याटमा प्यालेस्टिनी झण्डाको स्टिकर लगाएको कारण पाकिस्तान क्रिकेट बोर्डबाट जरिवाना खेप्नु परेको छ। ब्याट्सम्यान खानलाई राष्ट्रिय टी–२० प्रतियोगितामा ब्याटमा प्यालेस्टिनी झण्डाको स्टिकर लगाएको भन्दै म्याच शुल्कको ५० प्रतिशत जरिवाना गरिएको हो ।
अन्तर्राष्ट्रिय क्रिकेट काउन्सिल (आईसीसी) को नियम र सर्तहरू अन्तर्गत खेलाडीहरूको किट वा सामानहरूमा अस्वीकृत स्टिकरहरू राख्न पाइँदैन । खेलको समयमा धार्मिक र राजनीतिक सन्देशहरूमा आधारित स्टिकरहरू राख्न प्रतिबन्धित छ ।
पाकिस्तान क्रिकेट बोर्ड (पीसीबी) यस्तो मामिलामा आईसीसीको नियम पालना गर्न बाध्य छ। पाकिस्तान क्रिकेट बोर्डका अनुसार आजम खानलाई अन्तर्राष्ट्रिय क्रिकेट परिषद्को नियम उल्लङ्घन गरेको भन्दै जरिवाना लगाइएको हो ।
