रोम । कोपा इटालियाको क्वार्टरफाइनल खेलमा चिरप्रतिद्वन्द्वी लाजियोविरुद्धको खेलमा एएस रोमाका खेलाडी एडोवार्डो बोभमाथि बियरको बोतल प्रहार भएको छ । बुधबार राति भएको खेलमा तीनवटा रातो कार्डसमेत देखाइएको थियो ।
२२ वर्षीय खेलाडीलाई सब्सटिट्यु सन गर्ने बेला उनलाई पछाडिबाट बियरको बोतल हानिएको थियो । बोतल लागेर उनी मैदानमा ढलेका थिए ।
खेलमा लाजियो १–० गोलले विजयी बन्यो । माटिया जाकाग्नीले खेलमा निर्णायक गोल गरे । सन् २०२१ मा रोमाको नेतृत्व लिए यता जोसे मोरिन्होले ६ मध्ये चारवटा डर्बी खेलमा पराजित भएका छन् ।
