काठमाडौं । चन्द्रागिरीको सेतो पहरामा आज भएको दुर्घटनामा चिकित्सक परिवारको मृत्यु भएको छ।
दुर्घटनामा वरिष्ठ बालरोग विशेषज्ञ डा.महेशकुमार गौतमको परिवार र आफन्त गरी पाँच जनाको मृत्यु भएको हो ।
शनिबार बिहान काठमाडौंबाट चित्लाङतर्फ जाँदै गरेको भ्यान हिमचुली सेतो पहरास्थित सडकबाट पाँच सय मिटरभन्दा तल खसेको थियो। दुर्घटनामा ४ जनाको घटनास्थलमै मृत्यु भएको छ भने एक जनाको उपचारका क्रममा बयोधा अस्पतालमा मृत्यु भएको हो।
बा प्र–०१–०२३ च ६९८५ नम्बरको फोर्ड गाडीमा सवारमध्ये एक जना भने घाइते भएको जिल्ला प्रहरी कार्यालय काठमाडौंले जनाएको छ। दुर्घटनामा ३८ वर्षीय गौतमसहित उनको छोराछोरी र सासु ससुराको मृत्यु भएको छ।
गौतमसहित उनका ४ वर्षीय छोरा प्रियान्स गौतम, ६ वर्षीया छोरी स्मारिका गौतम, ६७ वर्षीय ओमकार निधि तिवारी र ६४ वर्षीया कल्पना तिवारीको मृत्यु भएको हो।
६ वर्षीया छोरीको उपचारका क्रममा अस्पतालमा मृत्यु भएको हो। दुर्घटनामा गौतमकी श्रीमती डा.सृष्टि तिवारी गौतम घाइते भएकी हुन्। उनी क्यान्सर रोग विशेषज्ञ हुन्। गौतम नेपाल आस्थमा एलर्जी सेन्टर लाजिम्पाटमा कार्यरत थिए।
