काठमाडौँ । एथ्लेटिक बिल्बाओसँग पराजित भएपछि जिरोनालाई स्पेनिस लिगाको उपाधि होडमा धक्का लागेको छ । सोमबार राति भएको खेलमा जिरोना एथ्लेटिक बिल्बाओसँग २–३ गोलले स्तब्ध बनेको हो ।
शीर्ष स्थानमा रहेको रियल मड्रिड आइतबार रायो भायेकानोसँग रोकिएपछि जिरोनालाई ६ अंकको दुरी घटाउने अवसर रहेको थियो । तर, टोली पराजित हुनपुग्यो । टोली पछिल्ला तीन खेलमा जीतविहीन रहेको छ ।
अलेहान्द्रो रेमिरोले खेलको दोस्रो मिनेटमा नै बिल्बाओलाई अग्रता दिलाएका थिए । दोस्रो हाफको सुरुवातमा भिक्टोर साइहान्कोभले जिरोनाका लागि बराबरी गोल फर्काए । तर, यो अवस्था लामो समय टिक्न सकेन । रेमिरोले ५६ औँ मिनेटमा पुनः एथ्लेटिकलाई अग्रता दिलाए । ६० औँ मिनेटमा इनाकी विलियम्सले टोलीको अग्रता फराकिलो बनाए । ७५ औँ मिनेटमा एरिक गार्सियाले जिरोनाका लागि एक गोल फर्काएपनि टोलीलाई हारबाट जोगाउन सकेनन् ।
२५ खेलपछि जिरोना ५६ अंकसहित लिगको दोस्रो स्थानमा छ । बार्सिलोनाले २ अंकले पछि तेस्रो स्थानमा छ । ५१ अंकसहित एट्लेटिको मड्रिड चौथो स्थानमा रहेको छ भने एथ्लेटिक बिल्बाओ ४९ अंकसहित पाँचौँ स्थानमा रहेको छ ।
