काठमाडौँ । उच्च अदालत जनकपुरको वीरगन्ज इजलासले नेपाल विद्युत् प्राधिकरणका कार्यकारी निर्देशक कुलमान घिसिङले काटेको विद्युत् कायम गर्ने पक्षमा अन्तरिम आदेश जारी गर्न अस्वीकार गरेको छ ।
हुलास स्टिलका तर्फबाट हिमांसु गोल्छाले दायर गरेको रिटमा उच्च अदालतले मंगलबार अन्तरकालीन अन्तरिम आदेश जारी गर्न अस्वीकार गरेको हो । डेडिकेटेड र ट्रंक लाइन महशुस नतिरेको भनी प्राधिकरणले हुलास स्टिलको लाइन कात्तिक ८ गते काटेको थियो ।
प्राधिकरणको उक्त निर्णयविरुद्ध गोल्छा उच्च अदालत पुगेका थिए । उच्च अदालतका न्यायाधिशद्वय नीलम पौडेल र अर्जुन महर्जनको संयुक्त इजलासले प्राधिकरणले लाइन विच्छेद गरेकाले अन्तरकालीन आदेश जारी गर्न नपर्ने आदेश गरेको हो ।
अदालतको यो आदेशपछि प्राधिकरणले लाइन काटेको निर्णय सदर भएको छ ।
