काठमाडौं । राष्ट्रिय स्वतन्त्र पार्टी (रास्वपा) उपनिर्वाचनमा होमिएको छ । केन्द्रीय निर्वाचन संयोजन समितिका संयोजक केन्द्रीय सदस्य एवं सांसद गणेश पराजुलीको सभापतित्वमा आज बसेको बैठकले स्थानीय तह उपनिर्वाचन, २०८१ मा निर्वाचन परिचालनका लागि जिम्मेवारी तोक्दै ७ प्रदेशमा कमाण्डर खटाउने र उपनिर्वाचनमा उम्मेदवार हुन इच्छुकसँग उम्मेदवारी आह्वान गर्ने निर्णय गरेको छ ।
जसअनुसार कोशी प्रदेशमा निशा डाँगी, मधेसमा डा चन्दा कार्की, बागमतीमा शिशिर खनाल, गण्डकीमा विन्दवासिनी कंसाकार, लुम्बिनीमा कुसुम महर्जन, कर्णालीमा लिमा अधिकारी र सुदूरपश्चिममा विष्णु कुमार श्रेष्ठलाई जिम्मेवारी दिएर कार्यक्षेत्रमा कमाण्डरको रूपमा खटाएको छ ।
पार्टी सभापति रवि लामिछाने सहकारी ठगी प्रकरणमा प्रहरी हिरासतमा छन् । कात्तिक २ गतेबाट कास्की प्रहरीको हिरासतमा रहेका रवि बिनानै रास्वपा उपनिर्वाचनमा होमिएको हो । आगामी मंसिर १६ गते हुने उपनिर्वाचनमा देशभर ४४ स्थान रिक्त छन् । तीमध्ये २ जिल्ला समन्वय समितिबाहेक अन्यन्त्र उम्म्ोदवारी दिने रास्वपाको तयारी छ । स्थानीय तहमा रास्वपाको यो पहिलो चुनावी यात्रा हो ।
रास्वपाका तर्फबाट स्थानीय तहमा उम्मेदवारी दिने उम्मेदवार चयन गर्न केन्द्रीय निर्वाचन संयोजन समितिले प्रारम्भिक निर्वाचन सञ्चालन गर्ने कार्यतालिका तय गरेको छ ।
यस्तो छ कार्यतालिका
१. उम्मेदवारी दर्ता, २०८१ कात्तिक २२ देखि २५ गते,दिउँसो २.०० बजे सम्म
२. प्रारम्भिक उम्मेदवारहरुको नामावली प्रकाशन, २०८१ कात्तिक २५ गते, साँझ ८.०० बजे सम्म
३. प्रारम्भिक उम्मेदवारी उपर दाबी विरोध, २०८१ कात्तिक २६ गते, साँझ ५.०० बजे सम्म
४. उम्मेदवारसँग छलफल, २०८१ कात्तिक २७ गते, साँझ ५.०० बजे सम्म
५. उम्मेदवारको अन्तिम नामावली प्रकाशन, २०८१ कात्तिक २७ गते
६. मतदान/निर्णय, २०८१ कात्तिक २८ गते, साँझ ७.०० बजे सम्म
७. नतिजा प्रकाशन, २०८१ कात्तिक २९ गते, दिउँसो १.०० बजे
उम्मेदवारीका लागि आवेदन दिन तल दिइएको गुगल फारम वा निर्वाचन परिचालन समितिमा उपलब्ध आवेदन फारम भरी दिन सकिने छ । राष्ट्रिय स्वतन्त्र पार्टीका तर्फबाट स्थानीय तहमा उम्मेदवारी दिने उम्मेदवार चयन गर्न केन्द्रीय निर्वाचन संयोजन समितिबाट तय गरिएको प्रारम्भिक निर्वाचन कार्यतालिका यसैसाथ संलग्न गरिएको छ ।
उम्मेदवारी आवेदन दिने लिंक
https://docs.google.com/…/1nww_YmgB-9…/edit…
