काठमाडौं, २९ माघ । नेपाली कांग्रेसका केन्द्रीय सदस्य बालकृष्ण खाणले पार्टी सभापति शेरबहादुर देउवासँग चित्त नबुझे उनकै अगाडि कुरा राख्न नेता तथा कार्यकर्तालाई आग्रह गरेका छन् ।
सोमबार कांग्रेस दाङ क्षेत्र नं.१ ले लमहीमा आयोजना गरेको भेटघाट कार्यक्रममा नेता खाणले कुनै पनि नेताको गाली विरोध गर्दा उनकै अगासिड गर्न आग्रह गरेका हुन् । ‘कांग्रेसमा जुन नेताको विरोध गर्ने हो त्यहि नेताको अगाडि विरोधी गरिदिनुपर्छ । अहिले यो कार्यक्रममा शेरबहादुर देउवा हुनुहुन्न । शेरबहादुर देउवालाई गाली गरेर के गर्नु हुन्छ ? गगन थापा यहाँ हुँदै हुनुहुन्न उहाँलाई गाली गरेर के गर्नु हुन्छ ?’ प्रश्न गर्दै उनले नेता तथा कार्यकर्तालाई भने ।
नेता खाणले कांग्रेसलाई आफ्नै साथीहरूले विरोध र असहयोग गरेका कारण ठूलो पार्टी बन्नबाट कठिनाई भइरहेको बताए । उनले गिरिजाप्रसाद कोईरालाको भनाइ स्मरण गराउँदै भने, ‘विरोध नगर्ने हो भने कांग्रेसलाई नम्बर १ पार्टी बनाउनबाट कसैले रोक्नै सक्दैन । गिरिजाप्रसाद कोइरालाले भन्दा हामी मनमनै हास्थ्यौं– ‘कांग्रेसले संसारलाई विश्वास गर्न सक्छ । कांग्रेसले कांग्रेसलाई नै हराउँछ’ त्यो कुरा सत्य रहेछ ।’
पूर्वगृहमन्त्री समेत रहेका नेता खाणले पार्टीको विरोधमा जाँदा कुनै पनि चुनावमा वडा, पालिका, प्रदेश, प्रतिनिधि सभामा कांग्रेस हार्ने गरेको बताए । उनले आफ्नै साथीको विरोध नगर्न आग्रह गरे । राम्रो काम गरेकोलाई राम्रो गरेको भन्नसमेत आग्रह गरे ।
क्षेत्रीय सभापति भेषराज पाण्डेको सभापतित्वमा भएको कार्यक्रममा केन्द्रीय सदस्य योगेन्द्र चाधरी, लुम्बिनी कांग्रेसका उपसभापति राजु खनाल, म्बिनी प्रदेशका मन्त्री जन्मजय तिमिल्सिना, लुम्बिनी प्रदेशकी सांसद लौका विक, पूर्वसांसद विमल नेपाली, नेपाल तरुण दल दाङका अध्यक्ष टीका घर्ती, पूर्वक्षेत्रीय सभापति भुपबहादुर डाँगी, जानकीलाल बस्नेतलगायतको उपस्थिति थियो । F
