पाकिस्तानी प्रधानमन्त्री शहबाज शरीफले आणविक हतियारबारे निर्णय गर्नका लागि देशको सर्वोच्च निकायको बैठक बोलाएका छन्।
‘प्रधानमन्त्रीले राष्ट्रिय कमाण्ड प्राधिकरणको बैठक बोलाउनुभएको छ,’ विज्ञप्तिमा भनिएको छ।
भारतको ‘अपरेशन सिन्दूर’ को जवाफमा पाकिस्तानले ‘अपरेशन बुन्यान–अल–मार्सूस’ सुरु गरेको छ। सुरक्षा स्रोतका अनुसार पाकिस्तानले भारतको ब्यास क्षेत्रमा रहेको ब्रह्मोस भण्डारण स्थल ध्वस्त पारेको पाकिस्तानी सञ्चारमाध्यमले जानकारी दिएका छन्।
पाकिस्तानले उधमपुरमा रहेको एयरबेस र पठानकोटमा रहेको एयरफिल्ड पनि ध्वस्त पारेको दाबी गरेको छ। भारतले पाकिस्तानमा आक्रमण गर्न प्रयोग गरेका सबै अड्डाहरूलाई निशाना बनाइरहेको इस्लामावादको दाबी छ।
पाकिस्तानी सशस्त्र सेनाले ब्रिगेड मुख्यालय पनि ध्वस्त पारेको भनेको छ। उरीमा रहेको आपूर्ति डिपो पूर्ण रूपमा ध्वस्त भएको पाकिस्तान रेडियोले उल्लेख गरेको छ। साइबर आक्रमणका कारण भारतको ७० प्रतिशत बिजुली ग्रिड निष्क्रिय भएको दाबी गरिएको छ।
पाकिस्तानी वायुसेनाको जेएफ–१७ थन्डर हाइपरसोनिक मिसाइलले आदमपुरमा भारतको एस–४०० वायु रक्षा प्रणाली ध्वस्त पारेको बताइएको छ। एस-४०० प्रणालीको मूल्य लगभग १.५ अर्ब डलर छ। पाकिस्तानले भारत र भारत प्रशासित कश्मीरमा धेरै निशानाहरूमा प्रहार गरेको दाबी गरेको छ।
पाकिस्तानले प्रहार गरेको भनिएका भारतीय सैन्य निशानाहरूमा ब्रिगेड मुख्यालय केजी शीर्ष, क्षेत्र आपूर्ति डिपो उरी, आर्टिलरी गन पोजिसन देरंग्यारी, ब्रह्मोस ब्याट्री साइट नगरोटा, उधमपुर हवाई क्षेत्र, पठानकोट एयरफिल्ड र सूरतगढ एयरफिल्ड छन्।
यीमध्ये धेरैजसो स्थानहरू नयाँ दिल्ली र इस्लामाबादबीचको विवादित कश्मीर क्षेत्रलाई विभाजन गर्ने वास्तविक सीमा नजिक वा छेउमा छन्। भारतले पनि पाकिस्तानी आक्रमणको जवाफ दिइरहेको दाबी गरेको छ।
