वासिङ्टन । अमेरिकी गायिका मेगन रुथलाई गोली हानेको आरोपमा १० वर्षको जेल सजाय भोगिरहेका ग्रामी-नामांकित क्यानेडियन र्यापर टोरी लेनेजमाथि हालै आक्रमण भएको छ।
जेलमा उनीसँगै बसेका एक व्यक्तिले उनलाई १४ पटक चक्कु प्रहार गरेका हुन् । आक्रमणका कारण गायकको अवस्था गम्भीर छ।
हालै, उनको टोलीले एक विज्ञप्ति जारी गर्दै घातक आक्रमणका कारण उनको दुवै फोक्सोमा क्षति पुगेको जानकारी दिएको छ। विज्ञप्तिमा टोरीलाई ढाड, टाउकोको पछाडि र अनुहारमा छुरा प्रहार गरिएको उल्लेख छ।
उनको दुवै फोक्सोमा क्षति पुगेको र उनलाई भेन्टिलेटरमा राखिएको छ। हाल उनी आफैँ सास फेर्न सक्षम छन् । पीडा भए पनि, उनी सामान्य रूपमा बोलिरहेका छन्।
टीएमजीको रिपोर्ट अनुसार, टोरी लेनेजमाथि सोमबार बिहान ७ बजेतिर क्यालिफोर्निया करेक्सनल इन्स्टिच्युटमा थुनामा रहेका एक व्यक्तिले आक्रमण गरेका थिए। आक्रमणको खबर पाउने बित्तिकै, तुरुन्तै ९११ मा सहयोगको लागि बोलाइयो र उनलाई उपचारको लागि अस्पताल लगियो।
क्यानेडियन र्यापर लेनेजले सन् २०२० मा अमेरिकी गायिका तथा लेखिका मेगन रुथ उर्फ मेगन थी स्टालियनलाई गोली हानेका थिए। सन् २०२० मा, गायिका मेगनले न्यूयोर्क टाइम्ससँगको एक अन्तर्वार्तामा टोरीले एक पार्टीपछि आफ्नो खुट्टामा दुई गोली हानेको आरोप लगाएकी थिइन्। यदि उनले यस विषयमा गुनासो नगरेमा गायकले उनलाई पैसा दिने प्रस्ताव गरेको पनि बताएकी थिइन्।
यस मुद्दामा र्यापर टोरीलाई अप्रिल २०२२ मा पक्राउ गरिएको थियो। अगस्ट २०२३ मा उनलाई दोषी ठहर गर्दै १० वर्षको सजाय सुनाइएको थियो ।
