मड्रिड । स्पेनको सामाजिक अधिकार मन्त्रालयले बार्सिलोनाका विङ्गर लामिन यामालले आफ्नो १८ औँ जन्मदिनको पार्टीमा ‘ड्वार्फिज्म’ (पुड्कोपन) भएका व्यक्तिहरूलाई मनोरञ्जनका लागि भाडामा लिएको आरोपमा सरकारी वकिलको कार्यालयलाई अनुसन्धान गर्न भनेको छ।
यामालले आइतबार बार्सिलोनाबाट ५० किलोमिटर उत्तर पश्चिममा रहेको ओलिभेला नामक सानो सहरमा पार्टी आयोजना गरेका थिए। जसमा युट्युबर, इन्फ्लुएन्सरहरू र बार्सिलोनाका केही टोलीका साथीहरू लगायतका पाहुनाहरू उपस्थित थिए।
यामालले त्यस क्रममा ‘पुड्कोपन’ भएका मनोरञ्जनकर्ताहरूको समूहलाई भाडामा लिएका थिए । जसलाई स्पेनको एक्रोकोन्ड्रपलासिया र अन्य स्केलेटल डिस्प्लेसिया भएका व्यक्तिहरूको संघ (एडीईई) ले ‘२१ औँ शताब्दीमा अस्वीकार्य’ भनेको छ।
बीबीसी स्पोर्टले सम्पर्क गर्दा, मन्त्रालय अन्तर्गतको अपाङ्गता भएका व्यक्तिहरूको लागि महानिर्देशनालयले भन्यो, ‘एडीईईले कानुनी उजुरी दर्ता गरेको छ। त्यसैले, यस महानिर्देशनालयले सरकारी वकिलको कार्यालयलाई कानुन र अपाङ्गता भएका व्यक्तिहरूको अधिकार उल्लङ्घन भएको छ कि छैन भनेर निर्धारण गर्न अनुसन्धान गर्न आग्रह गरेको छ।’
एडीईईले ‘मनोरञ्जनको अंशको रूपमा ‘ड्वार्फिज्म’ भएका व्यक्तिहरूलाई भाडामा लिने कार्यको सार्वजनिक रूपमा निन्दा गर्दछ’ भन्दै कानुनी कारबाही गर्ने बताएको छ । यसले ‘रूढिवादी धारणाहरूलाई कायम राख्ने, भेदभावलाई बढावा दिने, र अपाङ्गता भएका व्यक्तिहरूको छवि र अधिकारलाई कमजोर पार्ने जिकिर गरेको छ।
एक विज्ञप्तिमा, संघले भन्यो, ‘यी कार्यहरूले वर्तमान कानुनको मात्र होइन, समानतावादी र सम्मानजनक समाज बन्न चाहने समाजका आधारभूत नैतिक मूल्यमान्यताहरूको पनि उल्लङ्घन गर्दछ।’
यद्यपि, एक स्पेनिस रेडियो स्टेसनले पार्टीमा उपस्थित मनोरञ्जनकर्ताहरूमध्ये एक भएको दाबी गर्ने एक व्यक्तिको अन्तर्वार्ता प्रसारण गरेको थियो । उनले भने यामालको बचाउ गरेका छन्।
‘कसैले पनि हाम्रो अनादर गरेनन्, हामीले शान्तिपूर्ण रूपमा काम गर्यौँ,’ आफ्नो नाम नबताउने सर्तमा ती कलाकारले भने, ‘किन यति धेरै हल्ला भएको छ म बुझ्दिनँ। हामी सामान्य मानिस हौँ, जसले आफूले चाहेको काम पूर्ण रूपमा कानुनी तरिकाले गर्छौँ। हामी मनोरञ्जनकर्ताको रूपमा काम गर्छौँ। हामी किन यो गर्न सक्दैनौँ? हाम्रो शारीरिक अवस्थाको कारण? हामीलाई हाम्रो सीमा के हो थाहा छ र हामी यसलाई कहिल्यै नाघ्ने छैनौँ । हामी सर्कसका बाँदर होइनौँ।’
कलाकारले यो एक घण्टा चलेको र त्यसपछि मनोरञ्जनकर्ताहरू पार्टीमा सामेल भएको बताए। उनले भने, ‘हामी नाच्छौँ, पेय पदार्थहरू वितरण गर्छौँ, जादु गर्छौँ… धेरै प्रकारका सोहरू छन्। सबैले धेरै रमाइलो गरे।’-बीबीसी
