काठमाडौ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले आगामी निर्वाचनका लागि प्रधानमन्त्रीको उम्मेदवार घोषणा गरेका कुनै पनि नेता प्रधानमन्त्री नबन्ने दाबी गरेका छन्।
मंगलबार पार्टी कार्यालयमा सञ्चारकर्मीहरूसँग संक्षिप्त कुराकानी गर्दै उनले यस्तो बताएका हुन्।
बाहिरिँदै गर्दा संचारकर्मीले ‘तपाईंको पार्टीबाट प्रधानमन्त्रीको उम्मेदवार को हो ?’ भनी प्रश्न सोधेका थिए। सो प्रश्नको जवाफ दिँदै उनले अहिले घोषणा गरिरहेकाहरू कोही पनि प्रधानमन्त्री नहुने जिकिर गरे।
दाहालले भने, ‘जसले घोषणा गरेका छन्, कोही प्रधानमन्त्री हुँदैनन्।’
त्यस्तै, नयाँ दलहरूले मार्क्सवादलाई पुरानो वाद भनेर आलोचना गरिरहेको विषयमा सञ्चारकर्मीले राखेको जिज्ञासामा दाहालले मार्क्सवाद विज्ञान भएकाले कहिल्यै पुरानो नहुने तर्क गरे।
उनले भने, ‘विज्ञान कहिल्यै पुरानो हुँदैन। आगोले पोल्छ भन्ने कुरा पुरानो हुन्छ र ? हुँदैन। मार्क्सवाद पनि विज्ञान हो, पुरानो हुँदैन।’
पछिल्लो समय प्रमुख राजनीतिक दलहरूले आगामी निर्वाचनका लागि प्रधानमन्त्रीको उम्मेदवार घोषणा गर्ने क्रम बढेको छ।
नेकपा एमालेले अध्यक्ष केपी शर्मा ओलीलाई, राष्ट्रिय स्वतन्त्र पार्टी (रास्वपा) ले वरिष्ठ नेता बालेन्द्र शाहलाई र नेपाली कांग्रेसले सभापति गगनकुमार थापालाई प्रधानमन्त्रीको उम्मेदवारका रूपमा अघि सारेका छन्।
