काठमाडौँ । फिफा विश्वकप २०२६ को उद्घाटन खेलमा आयोजक मेक्सिकोले दक्षिण अफ्रिकालाई २–० गोलअन्तरले पराजित गर्दै प्रतियोगितामा विजयी सुरुवात गरेको छ।
मेक्सिको सिटीस्थित एस्टेका रङ्गशालामा नेपाली समयअनुसार शुक्रबार बिहान सम्पन्न खेल जितका साथै एक अनौठो कीर्तिमानका कारण पनि चर्चामा रह्यो। विश्वकप उद्घाटन खेलको इतिहासमै पहिलो पटक एउटै खेलमा तीन वटा रातो कार्ड देखाइएको हो।
खेलको दोस्रो हाफ सुरु भएलगत्तै दक्षिण अफ्रिकाका मिडफिल्डर स्पेफेलो याया सिथोलेले मेक्सिकोका ब्रायन गुटियरेजलाई स्पष्ट गोल अवसरबाट रोक्ने क्रममा फल गरेपछि सिधै रातो कार्ड पाएका थिए। खेलको अन्त्यतिर दक्षिण अफ्रिकाकै थेम्बा ज्वानले रोबर्टो अल्भाराडोको अनुहारमा प्रहार गरेको भिडियो सहायक रेफ्री (VAR) बाट पुष्टि भएपछि उनलाई पनि मैदान छाड्न बाध्य पारियो।
इन्जुरी समयमा मेक्सिकोका सेसार मोन्टेसले आक्रामक फल गरेपछि रेफ्री विल्टन परेरा साम्पायोले तेस्रो रातो कार्ड देखाएका थिए। यससँगै विश्वकप उद्घाटन खेलमा सर्वाधिक रातो कार्ड देखिएको नयाँ कीर्तिमान कायम भएको छ।
मेक्सिकोका लागि जुलियन क्विनोनेसले खेलको नवौँ मिनेटमै गोल गर्दै टोलीलाई अग्रता दिलाएका थिए। यो सन् २००६ यता विश्वकप उद्घाटन खेलमा भएको सबैभन्दा छिटो गोलसमेत बनेको छ।
दोस्रो हाफको ६७औँ मिनेटमा अनुभवी स्ट्राइकर राउल जिमिनेजले हेडमार्फत दोस्रो गोल गर्दै मेक्सिकोको जित सुनिश्चित गरे। यो उनको अन्तर्राष्ट्रिय करिअरको ४६औँ गोल हो, जससँगै उनले मेक्सिकोका लागि सर्वाधिक गोल गर्ने खेलाडीहरूको सूचीमा दोस्रो स्थानमा बराबरी गरेका छन्।
यो जितसँगै मेक्सिकोले विश्वकप इतिहासमा पहिलो पटक उद्घाटन खेलमा विजय हासिल गरेको दाबी गरिएको छ। यसअघि खेलेका सात उद्घाटन खेलमध्ये मेक्सिकोले पाँचमा हार र दुईमा बराबरी खेलेको थियो।
खेलमा १७ वर्षीय गिल्बर्टो मोराले मैदान प्रवेश गर्दै अर्को इतिहास रचे। १७ वर्ष २४० दिनको उमेरमा विश्वकप खेल्ने उनी मेक्सिकोका सबैभन्दा कान्छा खेलाडी बनेका छन् भने विश्वकप इतिहासका छैटौँ कान्छा खेलाडीका रूपमा पनि दर्ज भएका छन्।
यस जितसँगै समूह ‘ए’ मा मेक्सिकोले महत्वपूर्ण तीन अंक जोडेको छ।
