काठमाडौँ । फिफा विश्वकप २०२६ अन्तर्गत समूह ‘आई’ को खेलमा फ्रान्सले इराकलाई ३–० ले पराजित गर्दै अन्तिम ३२ मा स्थान पक्का गरेको छ।
फिलाडेल्फिया रंगशालामा सम्पन्न खेलमा फ्रान्सको जितमा कप्तान किलियन एम्बाप्पेले दुई तथा उस्मान डेम्बेलेले एक गोल गरे। एम्बाप्पेले १४औँ मिनेटमा माइकल ओलिसेको पासमा शानदार गोल गर्दै फ्रान्सलाई अग्रता दिलाएका थिए। पहिलो हाफ १–० मा सकिएको खेलमा उनले ५४औँ मिनेटमा दोस्रो गोल थपे। त्यसपछि ६६औँ मिनेटमा ओलिसेकै अर्को पासमा डेम्बेलेले गोल गर्दै फ्रान्सको जित सुनिश्चित गरे।
खराब मौसमका कारण खेल दोस्रो हाफ सुरु हुनुअघि करिब साढे दुई घण्टा रोकिएको थियो। लामो अवरोधपछि पुनः सुरु भएको खेलमा फ्रान्सले आफ्नो लय कायम राख्दै इराकमाथि स्पष्ट दबाब बनायो।
यो खेल फ्रान्सका कप्तान एम्बाप्पेको १००औँ अन्तर्राष्ट्रिय खेलसमेत थियो। उनले उक्त उपलब्धिलाई दुई गोलसहित स्मरणीय बनाए। यस्तै, डेम्बेलेले प्रमुख अन्तर्राष्ट्रिय प्रतियोगितामा आफ्नो पहिलो गोल गरे।
लगातार दोस्रो जित निकालेको फ्रान्सले समूह चरणको एक खेल बाँकी रहँदै अन्तिम ३२ मा स्थान सुरक्षित गरेको छ। पराजित इराक भने विश्वकपबाट बाहिरिने संघारमा पुगेको छ। अब इराकले अन्तिम समूह खेलमा सेनेगलविरुद्ध जित निकाल्नै पर्ने दबाब सामना गर्नेछ।
