काठमाडौँ । फिफा विश्वकप २०२६ मा केप भर्डेले ऐतिहासिक उपलब्धि हासिल गरेको छ। समूह ‘एच’को अन्तिम खेलमा साउदी अरेबियासँग गोलरहित बराबरी खेल्दै केप भर्डे उपविजेताका रूपमा पहिलो पटक विश्वकपको अन्तिम ३२ मा प्रवेश गरेको हो।
डेब्यु विश्वकप खेलिरहेको केप भर्डेले समूह चरण तीन खेलबाट तीन अंक जोड्दै दोस्रो स्थान हासिल गर्यो। दुई पटकको विश्वकप विजेता उरुग्वे र सन् २०३४ को आयोजक साउदी अरेबियालाई पछि पार्दै उसले इतिहास रच्न सफल भयो।
खेलमा केप भर्डेले नै गोल गर्ने अवसर बढी सिर्जना गरेको थियो। विली सेमेडो र लारोस डुआर्टेले उत्कृष्ट अवसर पाए पनि साउदी अरेबियाका गोलरक्षक मोहम्मद अल ओवैसले शानदार बचाउ गर्दै खेल गोलरहित राखे। दोस्रो हाफमा केभिन पिनाको लामो दूरीको प्रहार पनि लक्ष्यभन्दा थोरैले बाहिरिएको थियो।
यससँगै केप भर्डे विश्वकपको पहिलो सहभागितामै समूह चरण अपराजित रहने तेस्रो अफ्रिकी राष्ट्र बन्न सफल भएको छ।
अब केप भर्डेको सामना अन्तिम ३२ मा साविक विश्व विजेता अर्जेन्टिनासँग हुनेछ। मियामीमा जुलाई ३ मा हुने उक्त खेलमा केप भर्डेले आफ्नो ऐतिहासिक यात्रालाई निरन्तरता दिने चुनौती हुनेछ।
यता अर्जेन्टिनाले भने समूह चरणको अन्तिम खेल भोलि जोर्डनविरुद्ध खेल्दै समूह चरण टुंग्याउने तालिका छ। त्यसअघि अर्जेन्टिनाले खेलेका दुई खेलमध्ये पहिलो खेलमा प्रभावशाली जित दर्ता गरेको थियो भने दोस्रो खेलमा पनि उत्कृष्ट प्रदर्शन गर्दै लगातार दोस्रो जित निकालेको छ। दुई खेलबाट पूर्ण ६ अंक जोडिसकेको अर्जेन्टिना समूह विजेताको रूपमा नकआउट चरणमा पुगिसकेको छ।
यस कारण केप भर्डे र अर्जेन्टिनाबीचको सम्भावित भेट विश्वकपको अन्तिम ३२ को सबैभन्दा चासोका खेलमध्ये एक बन्ने अपेक्षा गरिएको छ।
