काठमाडौं । नेपाली राजनीतिमा वाम एकता बन्ने र भत्किने क्रम नयाँ होइन। तर, पुष्पलाल श्रेष्ठको स्मृति दिवसको अवसरमा देखिएको पछिल्लो राजनीतिक गतिविधिले फेरि एकपटक वाम ध्रुवीकरणको सम्भावनालाई बलियो बनाएको छ।
राजनीतिक स्रोतका अनुसार नेकपा एमालेका अध्यक्ष केपी शर्मा ओली र नेपाल कम्युनिष्ट पार्टीका संयोजक पुष्पकमल दाहालबीच पछिल्लो समय बढेको राजनीतिक निकटताले नयाँ सत्ता समीकरणको संकेत दिएको छ। यस रणनीतिक सहकार्यको मुख्य लक्ष्य नेपाली कांग्रेसलाई संघीय र प्रदेश राजनीतिमा कमजोर बनाउनु रहेको बताइएको छ।
स्रोतका अनुसार नयाँ सहमतिअनुसार मधेश प्रदेशमा जनता समाजवादी पार्टी (जसपा)का अध्यक्ष उपेन्द्र यादवको नेतृत्वमा सरकार गठन गर्ने र बाँकी छ प्रदेशमा एमाले–नेकपा गठबन्धनको सरकार बनाउने आन्तरिक समझदारी भएको दाबी गरिएको छ।
यो रणनीतिले उपेन्द्र यादवलाई वाम गठबन्धनसँग जोडिराख्ने र नेपाली कांग्रेसलाई सातै प्रदेशमा प्रतिपक्षमा सीमित गर्ने उद्देश्य राखिएको स्रोतको भनाइ छ। साथै, कम्युनिस्ट एकताको सन्देश तल्लो तहसम्म पुर्याएर कार्यकर्तामा नयाँ उत्साह सिर्जना गर्ने प्रयाससमेत भइरहेको बताइएको छ।
यस्तै, पार्टी एकीकरणको प्रक्रिया अघि बढेपछि पुष्पकमल दाहाललाई प्रतिनिधिसभामा संसदीय दलको नेता बनाउने तयारी रहेको स्रोतको दाबी छ। त्यसमार्फत प्रतिनिधिसभामा पनि कांग्रेसलाई तेस्रो दलमा सीमित पार्ने रणनीति वाम घटकहरूले बनाएको जनाइएको छ।
राजनीतिक विश्लेषकहरूका अनुसार ओली–दाहालबीचको यो नयाँ सहकार्य वैचारिक आधारभन्दा पनि पछिल्ला निर्वाचनमा देखिएको शक्ति सन्तुलनको परिवर्तन र कांग्रेसलाई राजनीतिक रूपमा घेराबन्दी गर्ने रणनीतिमा केन्द्रित देखिन्छ।
यद्यपि, यसबारे एमाले, नेकपा वा अन्य सम्बन्धित दलहरूले औपचारिक धारणा सार्वजनिक गरेका छैनन्। त्यसैले यी विषयहरू राजनीतिक स्रोतमा आधारित दाबीका रूपमा रहेका छन्। आगामी दिनमा हुने राजनीतिक निर्णय र दलहरूको औपचारिक घोषणापछि मात्रै नयाँ सत्ता समीकरणको वास्तविक चित्र स्पष्ट हुने देखिन्छ।
