लन्डन, १ भदौं । इन्टर मिलानले टोटनह्यामबाट इङ्गल्याण्डका फुल ब्याक जेड स्पेन्सलाई अनुबन्ध गरेको छ।
स्पेन्सले सेरी ए च्याम्पियनहरूसँग पाँच वर्षको सम्झौता गरेका छन्। रिपोर्टका अनुसार क्लबले २६ वर्षीय खेलाडीका लागि करिब ३० मिलियन युरो अर्थात २५.६ मिलियन पाउण्डमा यो सम्झौता गरेको हो ।
म्यानचेस्टर सिटीसँगको सम्झौता सकिए पछि जोन स्टोन्स सान सिरो (इन्टर मिलान) मा आबद्ध भए पछि यस गर्मीमा इन्टरमा सामेल हुने उनी दोस्रो इङ्गल्याण्डका खेलाडी बनेका छन्।
स्पेन्सले शनिबार नै आफ्नो सामाजिक सञ्जाल खाताहरूमा टोटनह्यामका समर्थकहरूका लागि बिदाइ सन्देश पोस्ट गर्दै आफ्नो स्थानान्तरण लगभग पक्का गरेका हुन् । त्यसमा उनले लेखेका थिए, ‘एउटा विशेष अध्यायको अन्त्य हुँदैछ। यो यात्रा अविस्मरणीय रह्यो, यसमा धेरै सम्झना, क्षण र अनुभवहरू छन्, जुन म सधैं आफूसँग राख्नेछु, विशेष गरी बिलबाओको त्यो रात।’
उनले अगाडी लेखेका छन, ‘मलाई यो यात्रामा सहयोग गर्ने सबै कर्मचारीहरू, परिवारजस्तै बनेका खेलाडीहरू र सबैभन्दा महत्त्वपूर्ण कुरा प्रशंसकहरूलाई धन्यवाद। अब नयाँ अध्याय सुरु गर्ने बेला आएको छ, तर मेरो हृदयमा स्पर्सको स्थान सधैं रहनेछ।’ थोमस टुचेलको टोली तेस्रो स्थानमा रहँदा स्पेन्सले विश्वकपमा इङ्गल्याण्डका सबै ८ खेल खेलेका थिए।
उनले २०२५-२६ सिजनमा सबै प्रतियोगिताहरूमा स्पर्सका लागि ४४ खेल खेलेका थिए यद्यपि पहिलो रोजाइका राइट ब्याक पेड्रो पोरोले जुनमा नयाँ सम्झौता गरेका थिए र लिभरपूलबाट लेफ्ट ब्याक एन्डी रोबर्टसनलाई भित्र्याइएको थियो ।
टोटनह्यामका प्रबन्धक रोबर्टो डे जेर्बीले जुलाईमा स्पेन्सलाई क्लबमै रहन मनाउने इच्छा व्यक्त गरेका थिए। स्पेन्स २०२२ मा मिडल्सब्रोबाट सुरुमा १२.५ मिलियन पाउण्डमा स्पर्समा आबद्ध भएका थिए र उत्तर लन्डनको यस टोलीका लागि ८५ खेल खेल्दै २०२४–२५ को युरोपा लिग उपाधि जिताउन मद्दत गरेका थिए।
सन् २०२४ मा जेनोआमा ६ महिनाको ‘लोन’ अर्थात अल्पकालीन सम्झौता मा बिताएपछि इटालीमा स्पेन्सको यो दोस्रो कार्यकाल हुनेछ।
