काठमाडौँ। गोरखाको उत्तरी भेगस्थित चुमनुब्री गाउँपालिका–७, छेकम्पारमा सोमबार बिहान भीषण पहिरो खसेपछि बुढीगण्डकी नदी थुनिन सक्ने उच्च जोखिम पैदा भएको छ। पहिरोका कारण नदीको बहाव थुनिँदा कृत्रिम ताल बन्न सक्ने र उक्त बाँध अचानक फुट्दा तल्लो तटीय क्षेत्रमा विनाशकारी बाढी आउन सक्ने भन्दै सरकारले सतर्कता अपनाउन आग्रह गरेको छ।
गृहमन्त्री सुधन गुरुङको सचिवालयले जारी गरेको सूचनाअनुसार सोमबार बिहान करिब १० बजे छेकम्पार क्षेत्रमा ठूलो पहिरो खसेको हो। भौगोलिक रूपमा अत्यन्तै विकट र संवेदनशील मानिने उक्त क्षेत्रमा खसेको पहिरोले बुढीगण्डकी नदीको बहाव रोक्न सक्ने प्रारम्भिक आँकलन गरिएको छ।
नदी थुनिएर ठूलो परिमाणमा पानी जम्मा भएमा त्यसले फुटेर तल्लो क्षेत्रमा अनपेक्षित तथा ठूलो धनजनको क्षति पुर्याउन सक्ने खतरालाई मध्यनजर गर्दै गृह प्रशासनले पूर्वसावधानीका उपायहरू तीव्र पारेको छ। सम्भावित जोखिमलाई ध्यानमा राख्दै बुढीगण्डकी नदीको तटीय तथा आसपासका क्षेत्रमा बसोबास गर्ने सर्वसाधारण नागरिकहरूलाई नदी किनारतर्फ नजान र तत्कालै सुरक्षित एवं अग्लो स्थानतर्फ स्थानान्तरण हुन आग्रह गरिएको छ।
गृह मन्त्रालयले यो प्रारम्भिक सूचना मात्र भएकाले स्थानीयवासीलाई आतङ्कित नहुन तर सतर्क रहन भन्दै स्थानीय प्रशासन तथा सुरक्षा निकायबाट जारी हुने आधिकारिक सूचना र निर्देशनलाई मात्र प्राथमिकता दिन अनुरोध गरेको छ।
विपद् वा कुनै पनि आपत्कालीन अवस्थाको जानकारी दिन वा तत्काल सहयोग आवश्यक परेमा राष्ट्रिय आपत्कालीन कार्यसञ्चालन केन्द्रको नि:शुल्क (टोल-फ्री) नम्बर १२३४ मा सम्पर्क गर्न सकिने व्यवस्था मिलाइएको छ।
हाल स्थानीय प्रशासन, नेपाल प्रहरी तथा सशस्त्र प्रहरी बलको टोलीले घटनास्थल र बुढीगण्डकी नदीको बहावको अवस्थाबारे सूक्ष्म निगरानी गरिरहेका छन्। स्थिति नियन्त्रणबाहिर जान नदिन र सम्भावित क्षति न्यूनीकरणका लागि स्थानीय सुरक्षा निकायहरूलाई उच्च सतर्कताका साथ तयारी अवस्थामा राखिएको छ।
