काठमाडौं । सहकारी ठगीसम्बन्धी प्रकरणमा पक्राउ परेका पूर्वउपप्रधान एवम् गृहमन्त्रीसमेत रहेका राष्ट्रिय स्वतन्त्र पार्टी (रास्वपा) सभापति रवि लामिछानेको तिहार हिरासतमै हुने भएको छ ।
पोखराको सूर्यदर्शन सहकारी ठगीबारे अनुसन्धानका लागि जिल्ला प्रहरी कार्यालय, कास्कीको हिरासतमा रहेका रविका अन्य सहकारीसम्बन्धी ठगीको पनि अनुसन्धान अगाडि बढेको छ ।
बुटवलको सुप्रिम सहकारी, चितवनको सहारा सहकारी, वीरगञ्जको सानो पाइला सहकारी र काठमाडौंको स्वर्णलक्ष्मी सहकारी ठगीसम्बन्धी पनि प्रहरीले अनुसन्धान अगाडि बढाउँदैछ ।
अनुसन्धान लगातार अघि बढाउनुपर्ने हुनाले रविलाई तिहारअगावै बाहिर नपठाउने प्रहरी स्रोतले बतायो ।
त्यसो त पर्साको वीरगञ्जस्थित सानो पाइला सहकारी ठगीबारे अनुसन्धान अगाडि बढिसकेको छ । “पोखरा (सूर्यदर्शन) र बुटवल (सुप्रिम) को अवस्था हेरेर अनुसन्धान अगाडि बढ्छ,” प्रहरी स्रोत भन्छ, “त्यसकारण उहाँको चाँडै बाहिर आउनुहुन्न ।”
सूर्य थापा नेतृत्वको विशेष संसदीय समितिको निर्देशनअनुसार रवि गत कात्तिक २ गते काठमाडौंमा पक्राउ परेका हुन् । त्यसलगत्तै उनलाई कास्कीको प्रहरी हिरासत पुर्याइएको थियो । उनीमाथि अनुसन्धानका लागि जिल्ला अदालत, कास्कीले दुईपटक म्याद थपको अनुमति दिइसकेको छ ।
रविको दल रास्वपाले भने शृङ्खलाबद्ध विरोध प्रदर्शन गरिरहेको छ । पार्टी सभापति रवि पक्राउलाई ‘प्रतिशोध’का रूपमा व्याख्या गरेका रास्वपा नेताहरूले पछिल्लो समय त्यसविरुद्धको विरोध प्रदर्शनलाई सहकारी पीडितविरुद्धको प्रदर्शन भनेर कुरा फेरेका छन् ।
सुरुमा पोखराकेन्द्रित विरोध प्रदर्शन गरेको रास्वपाले अहिले काठमाडौंकेन्द्रित भएर विरोध प्रदर्शन गरिरहेको छ । मङ्गलबार (हिजो) मात्रै प्रधानमन्त्री सरकारी निवास रहेको बालुवाटारमा विरोध प्रदर्शन गरेको थियो । जहाँ केन्द्रीय सदस्य पुकार बमसहित १५ भन्दा बढी रास्वपा नेताहरू पक्राउ परेका थिए, उनीहरू हिजै साँझ छुटिसकेका छन् ।
विरोध प्रदर्शनको कोणसभामार्फत रास्वपा नेताहरूले रविलाई हिरासतमा राखिरहनुको कुनै औचित्य नभएको जिकिर गरेका छन् । रास्वपाले मिनी संसद्लाई समेत रविलाई बाहिरै राखेर अनुसन्धान गर्न आग्रह गरेको छ ।
तर, यता प्रहरीले भने अनुसन्धान नसकिन्जेलसम्म रविलाई थुनामै राख्ने जनाऊ दिएको छ ।
