म्याड्रिड । किलियन एम्बाप्पेले अर्को सिजन रियल म्याड्रिडमा १० नम्बरको जर्सी लगाउने भएका छन्। आफ्नो डेब्यु सिजनमा उनले ९ नम्बरको जर्सी लगाएका थिए।
ईएसपीएनले स्रोतहरूलाई उद्धृत गर्दै यो जानकारी पुष्टि गरेको हो। लुका मोड्रिच १३ वर्षको बर्नाबेउ बसाइपछि एसी मिलान गएपछि १० नम्बरको जर्सी खाली भएको थियो।
एम्बाप्पेले फ्रान्सको राष्ट्रिय टोलीमा पनि १० नम्बरको जर्सी लगाउँछन्। एक स्रोतले ईएसपीएनलाई बताएअनुसार म्याड्रिडमा यो नम्बर उपलब्ध हुनेबित्तिकै उनले लिने योजना पहिलेदेखि नै थियो। तर, यदि मोड्रिचले आफ्नो सम्झौता एक वर्षको लागि बढाएको भए, एम्बाप्पे ९ नम्बरको जर्सीमै अर्को सिजन बिताउन तयार रहेको पनि स्रोतको भनाई छ।
गत सिजनमा पेरिस सेन्ट-जर्मेनबाट लामो समयदेखि प्रतिक्षित स्थानान्तरण पछि एम्बाप्पेले म्याड्रिडमा प्रभावशाली व्यक्तिगत सिजन बिताए। २६ वर्षीय खेलाडीले ला लिगामा ३१ गोल गर्दै प्रतियोगिताको शीर्ष स्कोरर बने। उनले क्रिस्टियानो रोनाल्डोले रियल म्याड्रिडको डेब्यु सिजनमा सबै प्रतियोगितामा गरेका ३३ गोलको कीर्तिमानलाई पनि उछिने।
ती गोलमध्ये चार गोल फाइनलमा आएका थिए: युइएफए सुपर कपमा एटलान्टामाथि २-० को जित, फिफा इन्टरकन्टिनेन्टल कपमा पाचुका माथि ३-० को जित, साथै कोपा डेल रे र स्पेनिस सुपरकोपामा बार्सिलोनाविरुद्धको हारमा पनि उनले गोल गरेका थिए।
यद्यपि, म्याड्रिडले कुनै पनि ठुलो उपाधि जित्न नसकेकोले एम्बाप्पेले केही पक्षबाट आलोचनाको सामना गर्नुपर्यो। ला लिगामा बार्सिलोनाभन्दा पछि दोस्रो स्थानमा रहनुका साथै च्याम्पियन्स लिगको क्वार्टरफाइनलमा आर्सनलसँग पराजित भएको थियो।
हालै संयुक्त राज्य अमेरिकामा सम्पन्न क्लब विश्वकपमा एम्बाप्पेले खासै प्रभाव पार्न सकेनन्। ग्यास्ट्रो एन्टेरिटिसका कारण अस्पताल भर्ना भएपछि उनी समूह चरणका खेलहरूमा सहभागी हुन सकेनन्। यद्यपि उनी नकआउट चरणमा फर्किए, तर म्याड्रिडको सहभागिता सेमिफाइनलमा एम्बाप्पेको पूर्व क्लब पिएसजीसँग ४-० को लज्जास्पद हारसँगै समाप्त भयो।
