काठमाडौं । पछिल्ला दिनमा सामाजिक सञ्जाल तथा विभिन्न माध्यमहरूमा हामी नेपाल र सुदन गुरुङ अन्तरिम सरकारमा सहभागी हुने भन्ने भ्रामक खबर फैलिएकोप्रति हामी नेपालले गम्भीर ध्यानाकर्षण गराएको छ।
संस्थाले जारी गरेको वक्तव्यमा भनिएको छ, ‘हामी नेपालका कुनै पनि प्रतिनिधि वा व्यक्तित्व अन्तरिम सरकारमा सहभागी हुने छैनन्। केवल योग्य, इमानदार र देशलाई उद्देश्यपूर्ण ढंगले अगाडि बढाउन सक्ने व्यक्तिहरूले मात्र नेतृत्वमा स्थान पाउनुपर्छ भन्ने हाम्रो अडान हो।’
वक्तव्यमा हामी नेपाल नेतृत्वको भूमिकामा नभई, जनताको आवाजको छायाँको रूपमा मात्र यस आन्दोलनमा सहभागी रहेको स्पष्ट गरिएको छ। ‘हामी सबैको सपना गौरवमय नेपाल निर्माण गर्ने हो। हामी यस आन्दोलनको हिस्सा हौं, तर कुनै पद वा लाभको अपेक्षा गरेका छैनौं। आजसम्म प्राप्त उपलब्धि सबैको सामूहिक प्रयासको नतिजा हो,’ वक्तव्यमा भनिएको छ ।
संस्थाले हल्ला र भ्रमलाई अन्त्य गर्न सबैलाई यो सन्देश साझा गर्न अनुरोध गरेको छ ।
