काठमाडौँ । सन् २०२६ को टी-२० विश्वकपमा भारत र पाकिस्तानबिचको बहुप्रतीक्षित भिडन्त अन्योलमा परेको छ। फेब्रुअरी १५ मा कोलम्बोमा तय भएको यो खेलमा पाकिस्तानले नखेल्ने घोषणा गरेपछि अन्तर्राष्ट्रिय क्रिकेट परिषद (आईसीसी) र पाकिस्तान क्रिकेट बोर्ड (पीसीबी) बिच पर्दा पछाडि छलफल सुरु भएको छ।
पाकिस्तान सरकारको निर्देशन अनुसार आफ्नो टोलीले भारतविरुद्ध मैदानमा नउत्रने निर्णय गरेको हो। बंगलादेशलाई विश्वकपबाट बाहिर राखिएको विरोधमा ऐक्यवद्धता जनाउन प्रधानमन्त्री शहबाज शरिफले यस्तो कदम चालेका हुन्।
सह-आयोजक भारतमा खेल्न नमानेका कारण बंगलादेशलाई प्रतियोगिताबाट हटाइएको थियो, जसलाई पाकिस्तानले दोहोरो मापदण्ड र अन्याय भनेको छ। पाकिस्तानले भारतविरुद्धको खेल बहिष्कार गरे पनि अन्य टोलीहरूसँगका खेल भने खेल्ने स्पष्ट पारेको छ।
यस संवेदनशील विषयलाई सुल्झाउन आईसीसीका उप-अध्यक्ष इमरान ख्वाजा र इमिरेट्स क्रिकेट बोर्डका मुबाशिर उस्मानीले मध्यस्थकर्ताको भूमिका खेलिरहेका छन्। उनीहरूले पीसीबीका अध्यक्ष मोहसिन नाभी र वरिष्ठ सल्लाहकार सलमान नासिरसँग निरन्तर संवाद गरिरहेका छन्। आईसीसीले पीसीबीलाई सबै सरोकारवालाहरूको हित हुने गरी आपसी सहमतिमा समाधान खोज्न आग्रह गरेको छ।
सुरुमा पाकिस्तानले विश्वकप नै बहिष्कार गर्ने आशंका व्यक्त गरेपछि आईसीसीले सम्भावित प्रतिबन्धको चेतावनी दिएको थियो। तर, पीसीबीले यो विषय आर्थिक नाफा-घाटाको नभई न्यायको भएको जवाफ दिएको छ।
पछिल्लो समय आईसीसीले पाकिस्तानका गुनासाहरू सम्बोधन गर्दै भारतसँगको खेल सुनिश्चित गराउन विशेष ध्यान केन्द्रित गरेको छ। विश्वभरका क्रिकेट प्रेमीहरूले चासोका साथ हेर्ने यो खेल रद्द हुँदा आईसीसीलाई ठूलो व्यावसायिक घाटा लाग्ने देखिएकाले सहमतिको प्रयास तीव्र पारिएको हो।
