काठमाडौँ । राष्ट्रिय स्वतन्त्र पार्टी छाडेर नेपाली कांग्रेसमा प्रवेश गरेका सर्लाहीका दीपक महतोलाई सो पार्टीका सभापति गगन थापाले जिम्मेवारी तोकेका छन् ।
सभापति थापाले आगामी प्रतिनिधिसभा निर्वाचनलाई कांग्रेसप्रति माहोल बनाउनका लागि राजनीतिक समन्वय गर्ने जिम्मेवारी महतोलाई दिएका हुन् ।
सभापति थापाद्वारा जारी पत्रअनुसार महतोलाई फाल्गुन २१ गते हुने प्रतिनिधिसभा निर्वाचनको तयारीका लागि विभिन्न क्षेत्रमा रहेका उम्मेदवारहरूसँग आवश्यक सहकार्य, रणनीतिक पहल तथा चुनावी वातावरण निर्माणको जिम्मेवारी दिइएको छ ।
साथै अन्य राजनीतिक धार र वैकल्पिक राजनीतिमा संलग्न व्यक्ति तथा समूहसँग संवाद गरी नेपाली कांग्रेसको पक्षमा सकारात्मक माहोल सिर्जना गर्नुपर्ने जिम्मेवारी समेत तोकिएको छ ।
डा.बाबुराम भट्टराईको साथ छाडेर रास्वपामा प्रवेश गरेका महतो सर्लाही–३ मा चुनाव लड्ने तयारी गरिरहेका थिए । तर अन्तिम समयमा उनलाई टिकट नदिएर नरेन्द्र साहलाई दिएपछि उनले विद्रोह गरेका थिए ।
टिकट वितरण गर्ने दिन उनी पार्टीको विरुद्धमा नाराबाजी गरेपछि प्रहरीले उनलाई पक्राउ पनि गरेको थियो । पछि उनी रास्वपा परित्याग गरेर कांग्रेसमा प्रवेश गरेका थिए ।
