काठमाडौ । श्रम संस्कृति पार्टीका अध्यक्ष हर्क साम्पाङले आफूविरूद्ध ज्यान मार्ने धम्की दिएको भन्दै साइबर ब्युरोमा उजुरी दिएका छन्।
सोमबार साम्पाङले सुनिता खड्का नाम गरेकी एक महिलाविरूद्ध उजुरी दिएका हुन्।
खड्का रास्वपा समर्थक रहेको उनले उजुरीमा उल्लेख गरेका छन्।
‘मलाई रास्वपाका समर्थक सुनिता खड्का नामकी व्यक्तिले टिकटकमा ज्यान मार्ने र मेरो घर जलाउने सम्मको धम्की आमसंचारमा दिँदै अत्यन्तै पाशविक शैलीमा गालीगलौज गरेको घटनाप्रति ब्युरोको ध्यानाकर्षण गराउँदै उनलाई तुरून्तै पक्राउ गरी कडाभन्दा कडा कानुनी कारबाही चलाउन अनुरोध गर्दछु,’ उनले सामाजिक सञ्जालमा उजुरी राखेका छन्।
साम्पाङले ती महिलाको टिकटक आइडी समेत समावेश गरेका छन्।
‘कारबाही गर्छ कि गर्दैन त आफ्नो समर्थकलाई सरकारले?,’ उनले लेखेका छन्।
ब्युरोका एसपी दिलिप गिरीले पनि साम्पाङको तर्फबाट उजुरी आएको पुष्टि गरे।
