काठमाडौँ । नेता सुदन किरातीले राष्ट्रिय स्वतन्त्र पार्टी (रास्वपा) को दोहोरो मापदण्डमाथि कडा प्रश्न उठाएका छन् । सामाजिक सञ्जाल फेसबुकमार्फत लामो स्टाटस लेख्दै किरातीले रास्वपाले चुनावमा निकै उचालेको फिर्ता बोलाउने अधिकारको औचित्यमाथि चुनौती दिएका हुन् ।
किरातीले रास्वपाको वाचापत्रमा उल्लेख भएको र निर्वाचनमा जनतालाई बाँडिएको ‘राइट टु रिकल’को नारा कसलाई लागु हुन्छ र कसलाई हुँदैन भन्दै पार्टीको नियतमाथि शङ्का व्यक्त गरे । उनले मधेसी अनुहारका तत्कालीन श्रममन्त्री दीपककुमार साहलाई सास फेर्न पनि मौका नदिई बर्खास्त गरिएको प्रसङ्ग उप्काउँदै गृहमन्त्रीको हकमा उक्त नियम आकर्षित हुन्छ कि हुँदैन भनेर सोधेका छन् ।
कानुन र नैतिकताको मापदण्ड व्यक्ति हेरेर लागु गरिएको भन्दै किरातीले व्यङ्ग्यात्मक शैलीमा गृहमन्त्रीको ‘जुङ्गा’को प्रसङ्ग ल्याएका छन् । उनले एउटै कानुन जुङ्गाअनुसार लागु हुन्छ कि हुँदैन भनेर प्रश्न गर्दै गृहमन्त्रीको जुङ्गा कत्रो छ, कति क्षेत्रमा फैलिएको छ र त्यसले कुन-कुन सिमानाहरू नाघेको छ भन्दै कडा कटाक्ष गरे ।
मानिसहरूले प्रश्न उठाएजस्तै त्यो जुङ्गाको जरा कुन-कुन शक्तिसँग जोडिएको छ भन्ने कुराको जवाफ रास्वपाले दिनुपर्ने उनको भनाइ छ । यो देश आफ्नो पनि भएको हुनाले थप शङ्काको सुविधा प्राप्त नहोस् भनेर रास्वपालाई यी प्रश्नहरू गरेको किरातीले प्रस्ट पारेका छन् ।
उनले नैतिकता र संस्कारको कुरा गर्ने रास्वपाका नेतालाई छानबिनको माग गरेर देखाउन चुनौतीसमेत दिए । संस्कार बोक्ने नैतिकवान् छाती नदेखाउने हो भने पुरानो र नयाँ दलमा के नै भिन्नता रह्यो र भन्दै उनले नयाँ दलको कार्यशैलीमाथि प्रहार गरेका छन् ।
