काठमाडौं, ७ असार । चारपटकको च्याम्पियन जर्मनी १२ वर्षपछि फिफा विश्वकपको नकआउट चरणमा प्रवेश गरेको छ ।
वैकल्पिक खेलाडीका रुपमा मैदान प्रवेश गरेका स्ट्राइकर डेनिज उन्डभको सानदार प्रदर्शनले जर्मनी १२ बर्ष पछि नकआउट चरणमा प्रवेश गर्न सफल भएको हो ।
शनिबार मध्यराति टोरन्टो रंगशालामा जर्मनीले अफ्रिकन टोली आइभरी कोस्टमाथि २–१ को दोस्रो जित हासिल गरे पछि जर्मनी अर्को चरणका लागि सुनिश्चित भएको हो । जर्मनीका लागि दुबै गोल वैकल्पिक खेलाडी उन्डभले गरेका थिए ।
पहिलो हाफमा आइभरी कोस्टले कप्तान फ्रान्क केसीको गोलमा अग्रता लिएको थियो । उन्डभ ६०औं मिनेटमा अट्याकिङ मिडफिल्डर यमाल मुसियालाको स्थानमा मैदान प्रवेश गरे । उनको प्रवेश पछि ४ मिनेट पछि नै जर्मनी खेलमा फर्कियो । उन्डभले उनीसँगै मैदान प्रवेश गरेका नादिम अमिरीको सुन्दर क्रसलाई सदुपयोग गरेका थिए ।
फेरी इन्जुरी समय सकिन २ मिनेट बाँकी छँदा डिफेन्सिभ मिडफिल्डर फेलिक्स एनमेकाको थ्रु पासमा थप गोल सम्भव भएको हो । पेनाल्टी बक्सभित्र उन्डभले बललाई टर्न गरे अनि विपक्षी रक्षा पङ्क्तिबाट कुनै अफ्ठ्यारो परिस्थिति सिर्जना हुन नपाउँदै प्रहार गरेका थिए ।
