स्पेनले अर्जेन्टिनालाई हराउँदै विश्वकप जितेपछि फाइनलको सबैभन्दा भावुक दृश्य १९ वर्षीय लामिन यामल र लियोनल मेसीबीच देखियो।
न्युयोर्क–न्यु जर्सी स्टेडियममा अर्जेन्टिनी समर्थकहरूले मेसीको नाम गुञ्जाइरहेका बेला ३९ वर्षीय कप्तान भावुक बने। समर्थकतर्फ हेर्दै उनको आँखाबाट आँसु झरेपछि यामल अघि बढेर उनलाई अँगालो हाल्दै सान्त्वना दिएका थिए।
धेरै फुटबलप्रेमीले यो दृश्यलाई ‘मेसी युगको अन्त्य र यामल युगको सुरुआत’को प्रतीकका रूपमा व्याख्या गरेका छन्। बार्सिलोनाको नम्बर १० जर्सी लगाउने यामलले सोही क्लबका महान् नम्बर १० मेसीलाई अँगालो हालेको क्षणले थप भावनात्मक अर्थ पाएको छ।
यामल र मेसीको सम्बन्ध यसअघि पनि चर्चामा आएको थियो। सन् २००७ मा परोपकारी क्यालेन्डरका लागि खिचिएको एउटा तस्वीरमा युवा मेसीले ६ महिनाका शिशु यामललाई नुहाइदिएको दृश्य सामाजिक सञ्जालमा भाइरल बनेको थियो। वर्षौँपछि त्यही शिशु विश्वकप विजेता बनेर आफ्नै आदर्शलाई सान्त्वना दिइरहेको दृश्यले फुटबल समर्थकलाई भावुक बनायो।
फाइनलअघि मेसीले पनि यामलको खुलेर प्रशंसा गरेका थिए। उनले बार्सिलोनालाई आगामी दिनमा यामलले नयाँ उचाइमा पुर्याउने विश्वास व्यक्त गरेका थिए।
यामलले दुई वर्षअघि स्पेनलाई युरोकप जिताउन महत्त्वपूर्ण भूमिका खेलेका थिए। अब १९ वर्ष ६ दिनको उमेरमा विश्वकप र युरोकप दुवै जित्ने इतिहासकै सबैभन्दा कम उमेरका खेलाडी बनेका छन्।
ह्यामस्ट्रिङ चोटबाट पूर्ण रूपमा निको नभए पनि यामलले विश्वकपभर उत्कृष्ट प्रदर्शन गरे। उनले खेलेका २८ प्रतिस्पर्धात्मक अन्तर्राष्ट्रिय खेलमध्ये स्पेन पराजित भएको छैन। साथै, ठूला प्रतियोगितामा उनले सुरुआत गरेका १३ खेलमा स्पेनले शतप्रतिशत जित निकालेको छ।
स्पेनका प्रशिक्षक लुइस दे ला फुएन्तेले यामलको प्रशंसा गर्दै टोलीका लागि उनले गरेको योगदान असाधारण रहेको बताए। पूर्व इंग्ल्यान्ड गोलरक्षक जो हार्टले पनि यामलले फाइनलमा अर्जेन्टिनाको दबाबलाई परिपक्व ढंगले सामना गरेको उल्लेख गर्दै उनको मानसिकता असाधारण रहेको प्रतिक्रिया दिएका छन्।
