काठमाडौं । पाकिस्तानको ब्रोड पिक हिमालमा गएको हिमपहिरोमा परी नेपाली पर्वतारोही तथा एलिट एक्स्पेड (Elite Exped) का वरिष्ठ माउन्टेन गाइड पुरबहादुर ‘युक्ता’ गुरुङको मृत्यु भएको छ।
उद्धार टोलीले शुक्रबार फेला पारेका चार शवमध्ये पुरबहादुर गुरुङको शवको पनि पहिचान भएको हो। उनी १० पटक सगरमाथा र २८ पटक आठ हजार मिटरभन्दा अग्ला हिमालहरूको सफल आरोहण गरिसकेका अनुभवी पर्वतारोही थिए।
पुरबहादुर गुरुङ विश्वकीर्तिमानी आरोही निर्मल पुर्जाका भरपर्दा वरिष्ठ गाइड तथा टोलीका मुख्य सहयोगीका रूपमा परिचित थिए।
यसैबीच, टोलीका नेता निर्मल पुर्जा भने अझै सम्पर्कविहीन छन्। उनको गार्मिन जीपीएस ट्र्याकिङ उपकरणबाट केही समयअघि लोकेसन संकेत प्राप्त भएको र डिभाइसमा केही गतिविधि देखिएकाले उद्धार टोलीले हेलिकप्टरसहित खोजी अभियानलाई तीव्र बनाएको जनाएको छ।
पाकिस्तानको काराकोरम हिमशृङ्खलास्थित ८,०४७ मिटर अग्लो ब्रोड पिकमा गएको हिमपहिरोपछि १० सदस्यीय अन्तर्राष्ट्रिय आरोही टोली प्रभावित भएको थियो। बेपत्ता अन्य आरोहीहरूको खोजी तथा उद्धार कार्य पनि जारी रहेको छ।
