काठमाडौँ, १८ भदौ । इङ्लिस क्लब म्यानचेस्टर सिटीमा आबद्ध भएपछि चेल्सीका समर्थकहरूसँग बिदा माग्ने क्रममा एन्जो फर्नान्डेजले हालैका दिनहरू आफ्नो लागि “राम्रो नरहेको” बताएका छन्।
स्टामफोर्ड ब्रिजमा बिताएका तीन वर्षको अवधिमा कहिलेकाहीँ निराशा र आक्रोश महसुस भए तापनि चेल्सी सधैँ आफ्नो हृदयमा रहने उनले उल्लेख गरेका छन्।
खेलाडी सरुवा बजारको अन्तिम दिन (ट्रान्सफर डेडलाइन डे) अर्जेन्टिनी मिडफिल्डर फर्नान्डेज १२ करोड ५० लाख पाउन्डमा म्यानचेस्टर सिटीमा आबद्ध भएका हुन्।
आफ्नो इन्स्टाग्राम पेजमा पोस्ट गरिएको भावुक सन्देशमा फर्नान्डेजले लेखेका छन्, “मेरा लागि यी दिनहरू सहज थिएनन्। यो सन्देश लेख्न पनि मलाई सजिलो लागिरहेको छैन। सत्य त यो हो कि, म मानसिक वा भावनात्मक रूपमा राम्रो अवस्थामा थिइनँ।”
उनले अगाडि लेखेका छन्, “तीन वर्षअघि कोभम र स्टामफोर्ड ब्रिज मेरो र मेरो परिवारका लागि घर बनेका थिए। म यहाँका मानिसहरू, क्लबको जर्सी र यसको प्रतीक (ब्याज) सँग भावनात्मक रूपमा जोडिएँ। ममाथि विश्वास गर्नुहोस्, यहाँ आइपुगेको पहिलो क्षणदेखि नै म जित हासिल गर्न र क्लबको इतिहासले माग गरे बमोजिमका उपाधिहरू भित्र्याउन पूर्ण रूपमा समर्पित थिएँ।”
२५ वर्षीय फर्नान्डेजले चेल्सीमा बिताएका उतार-चढावपूर्ण समयबारे खुलेर कुरा गर्दै भनेका छन्, “हामीले दुःख भोग्यौँ, आँसु झार्यौ र म धेरै पटक आक्रोशित पनि भएँ तर हामीले उपाधि र अविस्मरणीय जितहरूको उत्सव पनि मनायौ। सुख र दुःख दुवै समयमा हामी सँगै रह्यौ।”
आफ्नो खेल जीवन र निर्णयबारे स्पष्ट पार्दै उनले थपे, “म फुटबललाई त्यसरी नै बाँच्छु जसरी मेरो जीवन बाँच्छु- पूर्ण जोश र हृदयदेखि नै। त्यसैले म चाहन्छु कि तपाईंहरूले बुझ्नुहोस्- म तपाईंहरूको भावना पूर्ण रूपमा बुझ्छु। तर जीवन भनेको निर्णय लिने प्रक्रिया हो र अहिले मैले ती कठिन निर्णयहरूमध्ये एउटा लिनुपरेको छ। चेल्सीको स्थान सधैँ मेरो सोच र हृदयमा रहनेछ।”
समर्थकहरूको भावनाको कदर गर्दै उनले भनेका छन्, “मलाई समर्थकहरूको उत्साह थाहा छ, किनकि म पनि उस्तै छु। यदि म तपाईंहरूको ठाउँमा हुन्थेँ भने सायद म पनि यस्तै सोच्थेँ।”
बेन्फिकाका यी पूर्व खेलाडीले ‘ब्लुज’ (चेल्सी) लाई बिदाइ गर्ने क्रममा क्लबको उज्ज्वल र सफल भविष्यको कामनासमेत गरेका छन्।
