काठमाडौँ, २१ असोज । ब्युनस आयर्सस्थित ‘मोन्युमेन्टल’ रङ्गशालामा अर्जेन्टिनाका लागि आफ्नो २०८ औँ खेल खेल्दै लियोनेल मेस्सीले अन्तर्राष्ट्रिय फुटबल करिअरको सुखद अन्त्य गरेका छन्। अफ्रिकी मुलुक बेनिनविरुद्धको मैत्रीपूर्ण खेलमा अर्जेन्टिनालाई ३-० को जित दिलाउने क्रममा मेस्सीले अन्तिम गोल गरेका थिए भने दुई वटा ‘असिस्ट’ (पास) समेतकाे याेगदान गर्दै खेलकाे सुखद अन्त्य गरेका थिए ।
स्पेनसँग विश्वकपको फाइनलमा पराजित भएको छ साता पछि अर्थात् ३१ अगस्टमा मेस्सीले राष्ट्रिय टोलीबाट सन्न्यासको घोषणा गरेका थिए। उनले आफूसँग अब टोलीलाई दिने केही बाँकी नरहेको बताएका थिए। प्रशिक्षक लियोनेल स्कालोनीले मेस्सीले चाहेमा निर्णय फेरेर फर्कन सक्ने बताए पनि उनको अन्तर्राष्ट्रिय अध्याय भने औपचारिक रूपमा बन्द भइसकेको छ।
मियामीसँगको सम्झौता र क्लब भविष्य
राष्ट्रिय टोलीबाट बिदाइ लिए पनि उनको क्लब करिअर भने जारी छ। इन्टर मियामीसँग मेस्सीको सम्झौता सन् २०२८ को सिजनको अन्त्यसम्म (हरेक वर्ष समीक्षा हुने गरी) छ । उनीनिकट मानिसहरूका अनुसार मानसिक र शारीरिक रूपमा तयार महसुस गरेमा उनले सम्झौता नवीकरण गर्ने सम्भावना नै बढी छ।
खेलाडीदेखि मालिकसम्मको यात्रा
खेल जीवनपछिको योजनाबारे मेस्सीले यसअघि नै आफू प्रशिक्षकभन्दा ‘मालिक’ बन्न रुचाउने बताएका थिए। प्रशिक्षकको भाग्य हरेक हप्ताको नतिजामा निर्भर हुने भएकाले उनी अलि पछाडि बसेर क्लबको दिशा तय गर्न चाहन्छन्।
यसका लागि स्पेनमा आधार तयार पारिँदै छ। मेस्सीले अप्रिल महिनामा बार्सिलोना नजिकैको पाँचौँ श्रेणीको क्लब ‘युई कोर्नेला’ किनेका थिए। अक्टोबर १ मा, दोस्रो डिभिजनको क्लब ‘सीडी एल्डेन्से’ ले मेस्सीलाई नयाँ मालिकका रूपमा घोषणा गर्यो, यद्यपि यो सम्झौताका लागि स्पेनिस खेलकुद परिषद्को स्वीकृति बाँकी छ।
एल्डेन्से उनको फुटबल व्यवसायको मुख्य केन्द्र बन्नेछ। क्लबले ‘रियल ओभिडो’ लाई ४-१ ले हराएपछि मेस्सीले मालिकका रूपमा पहिलो सन्देश दिँदै इन्स्टाग्राममा लेखेका थिए: “आउपा डेपोर्टिभो” (डेपोर्टिभोको जय होस्)। मेस्सी मालिक बनेको खबर सार्वजनिक हुनासाथ करिब एक दर्जन प्रायोजकहरूले क्लबसँग सम्झौताका लागि सम्पर्क गरेका छन्।
क्लबहरूको सञ्जाल र अन्य लगानी
मेस्सीको व्यावसायिक संलग्नता स्पेनमा मात्र सीमित छैन:
उरुग्वे: उनले लुइस सुआरेजसँग मिलेर मे २०२५ मा ‘डेपोर्टिभो एलएसएम’ को स्थापना गरे, जसले पहिलो सिजनमै तेस्रो श्रेणीको लिगमा बढुवा पाएको छ।
इन्टर मियामी: सम्झौताअनुसार सन्न्यासपछि उनले इन्टर मियामीमा शेयर प्राप्त गर्नेछन्।
पारिवारिक बसोबास: उनका सबै गतिविधि युरोप र मियामीमा केन्द्रित छन्। परिवारको दीर्घकालीन बसोबास बार्सिलोनानजिकै समुद्र किनारमा रहेको ‘कास्टेलडेफेल्स’ मा भइसकेको छ।
‘मेस्सी कप’ र व्यवसायिक साम्राज्य
युवा फुटबलमा लगानी गर्दै उनले १६ वर्षमुनिका एकेडेमीहरूका लागि ‘मेस्सी कप’ सञ्चालन गर्दै आएका छन्। सन् २०२५ मा ८ टोलीबाट सुरु भएको यो प्रतियोगितामा यस वर्ष अक्टोबर २५ देखि १६ टोली सहभागी हुँदैछन् । फोर्ब्सका अनुसार मेस्सीको कुल सम्पत्ति करिब १.१ अर्ब (१ अर्ब १० करोड) अमेरिकी डलर पुगेको छ। उनले अघिल्लो वर्ष मात्र फुटबल र व्यवसायबाट १४ करोड डलर कमाएका थिए।
प्रायोजन: सन् २०१७ मा एडिडाससँग गरिएको आजीवन साझेदारी उनको सबैभन्दा चर्चित सम्झौता हो।
होटल र रेस्टुरेन्ट: ‘मिम हाेटेल्स अन्तर्गत इबिजादेखि अन्डोरासम्म ६ वटा बुटिक होटलहरू छन्। रोसारियोमा ‘कारास्को एम’ घर निर्माण आयोजना र ‘एल क्लब डे ला मिलनेसा’ रेस्टुरेन्ट शृङ्खलामा पनि उनको साझेदारी छ।
अन्य ब्रान्ड: उनले ‘स्टानली’ सँग मिलेर ‘माटे’पेय पदार्थ पिउने भाँडाको सङ्ग्रह समेत बजारमा ल्याएका छन्।
पारिवारिक विरासत र अगाडिको बाटो
मेस्सीको व्यावसायिक यात्रा उनका बुबा जर्ज मेस्सीले सुरु गरेका थिए। टेलिभिजन उत्पादन, मार्केटिङ र मिडिया क्षेत्रमा व्यवसाय विस्तार भइसकेको अवस्थामा गत अगस्टमा ६८ वर्षको उमेरमा जर्जको निधन भयो। अहिले मेस्सी आफ्ना पुराना र विश्वासिला साथीहरूको टोलीमार्फत यो साम्राज्य सम्हालिरहेका छन्।
गत नोभेम्बरमा मियामीमा आयोजित ‘अमेरिका बिजनेस फोरम’ मा बोल्दै मेस्सीले भनेका थिए, “व्यवसायमा मेरो रुचि छ। म सिक्न चाहन्छु किनभने म भर्खरै सुरुवात गर्दैछु।” खेल मैदानभित्र र बाहिर दुवैतर्फ मेस्सीको साम्राज्य उत्तिकै मजबुत देखिन्छ।
