भिनिसियस जुनियर र रोड्रिगोले दुई दुई गोल गरेपछि रियल मड्रिडले स्पानिस ला लिगामा भ्यालेन्सियालाई ५-१ ले पराजित गरेको छ ।
घरेलु मैदान सान्टियागो वर्नाबेउमा भएको खेलको तेस्रो मिनेटमै डानी कार्भाजलले गोल गर्दै रियललाई अग्रता दिलाएका थिए ।
त्यसपछि भिनिसयसले ४२औं र ४९औं मिनेटमा गोल गरे । दुवै गोलका लागि रोड्रिगोले असिस्ट गरे । अनी रोड्रिगो आफैंले ४९औं र ८४औं मिनेटमा गोल गरे ।
भ्यालेन्सियाका लागि ८८औं मिनेटमा डुरोले सान्त्वना गोल फर्काए ।
जितपछि रियलले १३ खेलबाट ३२ अंक जोडेको छ र दोस्रो स्थानमै कायम छ । शीर्ष स्थानको गिरोना भन्दा रियल दुई अंकले पछि छ ।
गिरोनाको लय कायमै
स्पानिस ला लिगामा यस सिजन सानो क्लब गिरोनाले उत्कृष्ट प्रदर्शन कायम राख्दै शीर्ष स्थानमै छ ।
गएराती भएको खेलमा गिरोनाले राभो भालेकानोलाई एक गोलले पछि परेको स्थिती उल्टाउँदै २-१ ले हरायो ।
घरेलु मैदानमा अल्भारो गार्सियाले पाँचौ मिनेटमै गोल गर्दै रायो भालेकानोलाई अग्रता दिलाएका थिए ।
तर अर्टेम डोव्बाइकले ४२औं मिनेटमा गिरोनाका लागि बराबरी गोल गरे । त्यसपछि साभियोले ६५औं मिने६मा गिरोनाका लागि विजयी गोल गरे ।
जितपछि १३ खेलबाट ३४ अंक जोडेर गिरोना शीर्ष स्थानमा यथावत छ ।
