इतिहाद । अर्लिङ हालान्डले नोभेम्बरपछि पहिलोपटक गोल गर्दा म्यानचेस्टर सिटीले एभर्टनलाई संघर्षपूर्ण खेलमा पराजित गरेको छ । २–० गोलको जीत हासिल गर्दै सिटी प्रिमियर लिगको शीर्ष स्थानमा उक्लिएको हो ।
चोटका कारण डिसेम्बर र जनवरी महिनामा मैदान बाहिर रहेका हालान्डले पहिलो गोलको लागि ७१ औँ मिनेटसम्म पर्खनुपरेको थियो । नथान अकेको पासमा गोल गर्दै उनले टोलीलाई अग्रता दिलाए ।
त्यसअघिसम्म एभर्टनले अनुशासित खेल प्रदर्शन गर्दै साबिक विजेता टोलीलाई रोक्न सफल भएको थियो । ८५ औँ मिनेटमा केभिन डी ब्रुयनाको पासमा हालान्डले दोस्रो गोल गर्दै टोलीको जीत सुनिश्चित गरे ।
२३ खेलपछि सिटीको ५२ अङ्क रहेको छ । समान खेलबाट ५१ अङ्क बटुल्दै लिभरपुल दोस्रो स्थानमा छ । ४९ अङ्कसहित आर्सनल तेस्रो स्थानमा रहेको छ ।
