एम्सटरड्याम । स्कटल्याण्डले आफ्नो जीतविहीन यात्रा कायम राख्दै नेदरल्याण्ड्सविरुद्ध लज्जास्पद हार बेहोरेको छ । शुक्रबार राति भएको मैत्रीपूर्ण खेलमा नेदरल्याण्ड्स ४–० गोलअन्तरले विजयी बनेको हो ।
खेलको ४० औँ मिनेटमा तिजियानी रइजन्डर्सले गोल गर्दै डच टोलीलाई अग्रता दिलाएका थिए । त्यसपछि लामो समय स्कटल्याण्डले नेदरल्याण्ड्सलाई रोक्न सफल भए पनि खेलको अन्त्यतिर लगातार गोल खान पुगेको थियो ।
७२ औँ मिनेटमा जर्जिनो विज्नाल्डमले दोस्रो गोल गरे । ८४ मिनेटमा वोउट वेगहोर्स्टले अर्को गोल थपे । त्यसको तीन मिनेटपछि नै डोनयेल मालेनले टोलीका लागि चौथो गोल गरे ।
स्कटल्याण्डले पछिल्ला ६ खेलमा १८ गोल खाएको छ । सन् २०२४ को युरोअघि टोलीले अब तीनवटा मैत्रीपूर्ण खेल खेल्न बाँकी रहेको छ ।
