काठमाडौँ । अनलाइन मार्फत सट्टेबाजी गराएको आरोपमा प्रहरीले एकजना युवकलाई पक्राउ गरेको छ । पक्राउ पर्नेमा काठमाडौँ महानगरपालिका वडा नम्बर–५ घर भएका ३० वर्षीय किपेश महर्जन छन् ।
महर्जनले विभिन्न व्यक्तिको नाममा वालेट तथा बैंक खाता संचालन गरेर २ करोड ७२ लाख कारोबार गरेको भेटिएको उपत्यका अपराध अनुसन्धान कार्यालयका सूचना अधिकारी (एसपी) काजी कुमार आचार्यले बताए ।
अनलाइनमार्फत बेटिङ साइटहरुमा पहुँच राखेर उनले ‘बाजी राख्दा जितिन्छ’ भनेर सट्टेबाजी गराएको प्रहरीको अनुसन्धानबाट थाहा भएको छ । उनलाई कानुनी कारबाही गर्न अपराध अनुसन्धान कार्यालयले जिल्ला प्रहरी परिसर टेकुमा पठाएको छ ।
