माइतीघर मण्डलस्थित राष्ट्रिय झण्डा राखेको पोलबाट आत्महत्याको प्रयास गरेकी आरती रावल गिरीलाई प्रहरीले उद्धार गरेको छ। मंगलबार दिउँसो उनी माइतीघर मण्डलमा रहेको झण्डा राखिएको पोलमा आत्महत्या गर्ने भन्दै उक्लिएकी थिइन्।
उनलाई त्यहाँबाट प्रहरीले उद्धार गरिसकेको काठमाडौँ परिसरका प्रवक्ता एसपी नजराज अधिकारीले नेपालखबरलाई जानकारी दिए।
एसपी अधिकारीका अनुसार, अहिले उनको वीर अस्पतालमा उपचार भइरहेको छ। आफ्नै श्रीमान्बाट बलात्कारमा परेको भनदै उनले सहमतिबिना शारीरिक सम्बन्ध राखेको भनी मुद्दा दायर गरेकी थिइन्।
सो मुद्दामा गत जेठ २८ गते बलात्कार मुद्दामा दोषी ठहर गरेको थियो। सोही मुद्दामा दोषी ठहर निलम्बित न्यायाधीश भुवन गिरीविरुद्ध ७ वर्ष कैद सजाय हुने फैसला भएको थियो।
उनले गत माघ २ गते सर्वोच्च अदालतअगाडि आत्मदाह प्रयास गरेकी थिइन्।
त्यस्तै, गत चैत २१ गते उनले रावलले सर्वोच्च अदालतको इजलासमै विष सेवन गरेकी थिइन्।
