काठमाडौं । सहकारी ठगी प्रकरणमा पोखराबाट काठमाडौं ल्याइएका राष्ट्रिय स्वतन्त्र पार्टी (रास्वपा) का सभापति रवि लामिछानेको बयान सकिएको छ ।
जिल्ला प्रहरी परिसर काठमाडौंबाट मुद्दा चलाइएका लामिछानेको काठमाडौंमा लिइने बयान सकिएको छ । लामिछानेसँग शुक्रबार, आइतबार र आज बयान लिइएको हो ।
काठमाडौंमा बयान सकिएपछि लामिछानेलाई भोलि कास्की प्रहरीकै हिरासतमा पठाउने तयारी भएको छ ।
लामिछाने माथि देशका विभिन्न सहकारी ठगीको मुद्दा छ । पोखरा पुर्याउने बित्तिकै लामिछानेलाई बयानका लागि चितवन लगिँदै छ । जिल्ला प्रहरी कार्यालय चितवनमा सहारा चितवन बहुउद्देश्यीय सहकारी संस्थाको रकम ठगी गरेको आरोपमा लामिछाने विरुद्ध जाहेरी परेको छ ।
पीडितको जाहेरीका आधारमा जीवी राई, लामिछाने र छविलाल बन्जाडे जोशीविरुद्ध मुद्दा चलेको छ ।
