काठमाडौ । रौतहटको चन्द्रपुर नगरपालिका–८ सन्तपुरमा टाटा सुमो अनियन्त्रित भएर घरभित्र पसेपछि क्षति भएको छ ।
ना १ ज २०८२ नम्बरको शिखरपुर टाटा सुमो चन्द्रनिगाहपुर-गौर सडकबाट ३० मिटर पर रहेको दिनेश सापकोटाको घरमा छिरेको हो ।
घटनाका समयमा घरको आँगनमा रहेका दिनेशका परिवारका सदस्यहरू – उनकी आमा, श्रीमती, छोराछोरी, भाउजू र भतिजी – सुमोलाई देखेर समयमै भाग्न सफल भएका कारण मानवीय क्षति भने टरेको छ । स्थानीय जनकराज भारतीका अनुसार, भाग्यवश सबै जना सुरक्षित रहे तापनि घरको गारोमा ठूलो क्षति पुगेको छ ।
प्रत्यक्षदर्शीहरूका भनाइमा, टाटा सुमोका चालक मादक पदार्थ सेवन गरी लापरबाहीपूर्वक सवारी चलाइरहेका थिए । दुर्घटना शनिवार दिउँसो करिब ५ बजे भएको हो । चन्द्रनिगाहपुरबाट कटहरियातर्फ गइरहेको सुमो अनियन्त्रित भएपछि सो दुर्घटना भएको स्थानीयले जानकारी दिएका छन् ।
दुर्घटनापछि स्थानीयवासीले मापसे गरी सवारी चलाउने चालकलाई कडा कानुनी कारबाही गर्न माग गरेका छन् । साथै, पीडित परिवारलाई उचित क्षतिपूर्ति दिनुपर्नेसमेत उनीहरूको माग छ । प्रहरीले टाटा सुमो र चालकलाई भने नियन्त्रणमा लिएको छ ।
दुर्घटनाले स्थानीय क्षेत्रमा सुरक्षाका उपायमा पुनर्विचार गर्नुपर्ने आवाज उठाएको छ ।
