काठमाडौं । हामी नेपालका संयोजक सुदन गुरुङले आफूमाथि आक्रमण प्रयास भएको दाबी गरेका छन् ।
गुरुङको दाबीअनुसार, बुधबार रानीबारीदेखि बानेश्वरसम्म पल्सर बाइकमा रहेको एउटा समूहले लेखेटेको थियो। त्यसपछि बीचमा दुईवटा गाडी थपिएर पच्छ्यायो।
‘सिनामंगलको गल्ली-गल्ली पछि पनि खोजिराथे रे ! यता बानेश्वरसम्मै लखेटे। ती को थिए भन्ने चाहिँ चिनिनँ। मार्ने उद्देश्यले नै आएका देखिन्थे,’ उनले भने ।
आफू कुन स्थानमा छु भन्ने चाहिँ उनले खुलाउन चाहेनन्।
जिल्ला प्रहरी परिसर काठमाडौंका एक अधिकारीले भने यसबारे कुनै जानकारी नभएको बताए । ‘उहाँमाथि आक्रमण प्रयास भएको हामीलाई कुनै जानकारी छैन,’ ती अधिकारीले भने ।
गुरुङ हामी नेपाल नामक संस्थाका अध्यक्ष हुन् । विशेषगरी २३ र २४ भदौमा भएको जेनजीहरूको प्रदर्शनपछि उनी चर्चामा छन् ।
गुरुङ अन्तरिम सरकार निर्माणका बेलामा राष्ट्रपति कार्यालयमा भएको छलफलमा समेत सहभागी थिए । प्रधानमन्त्रीमा सुशीला कार्की नियुक्त भएपछि उनी शपथ ग्रहण समारोहमा देखिएका थिए ।
प्रधानमन्त्री कार्कीलाई गुरुङले ढोगेको तस्वीरले सामाजिक सञ्जालमा चर्चा पाएको थियो ।-अनलाइन खबर
