काठमाडौँ । नेपालको कानुन अनुसार बहुविवाह अपराध हो । यद्यपि ब्राजिलका एक युवक भने ६ वटी पत्नीलाई एउटै घरमा मात्र होइन, एउटै बेडमा राखेर चर्चामा छन् ।
सामाजिक सञ्जालमा चर्चित ब्राजिलियन इन्फ्लुएन्सर आर्थर ओ उर्सो यस्तै घटनाका कारण चर्चित छन् । हालै उनले सामाजिक सञ्जालमा आफ्नो एक विशेष बेड (पलङ)को तस्बिर सार्वजनिक गरेका छन्, जसले उनी थप चर्चामा आएका छन् ।
उर्सोका ६ वटी पत्नी छन् । उनले ६ वटै पत्नीसँग समदुरीको सम्बन्ध राख्दै आएका छन् । दाम्पत्य जीवनलाई अझ सहज तुल्याउन उनले ६ वटै पत्नी अटाउने गरी एउटा विशेष बेड बनाएका हुन् ।
उक्त बेड तयार पार्न करिब १५ महिना समय लागेको बताइएको छ । १२ जना कामदारले उक्त पलङ निर्माण गरेका हुन् । ६ पत्नी र आफूसहित ७ जनाको भार उठाउन समस्या नहोस् भनेर उक्त बेडलाई बलियो बनाउनका लागि ९५० वटा स्क्रु (पेच) ठोकिएको छ ।
यो बेड २० फिट चौडा र ७ फिट लामो यो बेड सामान्य कोठामा अट्दैन । त्यसैले उनले आफ्नो बेडरुमको आकार पनि ठुलो बनाएका छन् ।
उर्सो बहुपत्नीकै कारण चर्चित भएका हुन् । यद्यपि उनी कुनै पनि पत्नीले अन्याय अनुभूति गर्न नपरोस् भन्नेमा आफू सचेत रहेको दाबी गर्छन् ।
एक समय उनका ९ पत्नी थिए । तीमध्ये चार जनासँग उनको सम्बन्ध विच्छेद भएको थियो । पछि उनले ५१ वर्षीय ओलिंडा मारियासँग बिहे गरे । अहिले उनीसँग ६ पत्नी छन् ।
