सिचुवान । चीनका एक किसानले आफ्नो सुँगुरलाई वधशालासम्म पुऱ्याउन अपनाएको अनौठो र आधुनिक तरिका महँगो सावित भएको छ।
सुँगुरलाई ट्रकमा लोड गरेर लैजान झन्झटिलो र समय लाग्ने भएपछि उनले ठुलो रिमोट कन्ट्रोल ड्रोनमा बाँधेर उडाउने निर्णय गरे। तर, उनको यो योजना पूर्ण रूपमा सफल हुन सकेन।
ड्रोनको पहिलो उडानकै क्रममा भिजिबिलिटी कम भएका कारण उक्त ड्रोन उच्च भोल्टेजको बिजुलीको तारमा अड्किएको थियो। यसले गर्दा ड्रोनमा झुण्ड्याइएको सुँगुर घन्टौँसम्म हावामै रह्यो भने सिचुआनको एउटा सिङ्गो गाउँमा विद्युत सेवा अवरुद्ध भयो। तारमा अल्झिएको ड्रोन निकाल्न किसानले आफैँ प्रयास गरे पनि सफल नभएपछि अन्ततः विद्युत प्राधिकरणलाई गुहार्न बाध्य भए।
प्राधिकरणका १२ जना कर्मचारीलाई १० घन्टासम्मको मेहेनतपछि बिजुली पुनः सुचारु गर्न हम्मे–हम्मे परेको थियो। यस मर्मतका लागि झन्डै १० हजार युआन खर्च भएको अनुमान गरिएको छ।
ती किसानले पहाडी भूगोलमा गाडीबाट सुँगुर लैजान गाह्रो हुने भएकाले समय र पैसा बचाउन ड्रोनको प्रयोग गरेको बताए पनि उनी कानुनी कारबाहीबाट भने उम्किन पाएनन्।
अनुसन्धानका क्रममा उनले उडान निषेधित क्षेत्र मा ड्रोन उडाएको र ड्रोनको क्षमताभन्दा बढी भार लादेको पाइएकाले उनलाई दोषी ठहर गरिएको छ। पछिल्लो समय चीनका विकट पहाडी क्षेत्रहरूमा पशुचौपाया ओसार्न कृषि ड्रोनहरूको प्रयोग बढ्दै गए पनि यस्ता लापरबाहीले भने गम्भीर दुर्घटनाको जोखिम बढाएको छ।
