रामेछाप । जबरजस्ती करणीको गम्भीर आरोप लागेका सिन्धुलीको दुधौली नगरपालिकाका प्रमुख दिनेश अधिकारी दनुवार पक्राउ परेपछि लामो समयदेखि अन्यायको बोझ बोकेर बसिरहेकी १७ वर्षीया पीडित बालिकामा न्याय पाउने आशा पलाएको छ ।
सिन्धुलीको दुधौली नगरपालिका का नगरप्रमुख अधिकारीलाई मंगलबार जिल्ला प्रहरी कार्यालय सिन्धुलीमा उपस्थित भएपछि नियन्त्रणमा लिइएको प्रहरीले जनाएको छ। गत वैशाख महिनामा ती किशोरीले अधिकारी विरुद्ध जबरजस्ती करणीको जाहेरी दर्ता गराएकी थिइन् । जाहेरी परेपछि नगरप्रमुख अधिकारी फरार थिए । मंगलबार उनी स्वयं प्रहरी कार्यालयमा हाजिर हुन पुगेका हुन् ।
जाहेरीअनुसार ती बालिका १७ वर्षको उमेरमै जबरजस्ती करणीको सिकार भएकी थिइन्। उनी गर्भवती भई २०८१ फागुनमा शिशु जन्माएकी छिन्। शिशु जन्मिएपछि मात्र घटना सार्वजनिक भएको परिवारजनले बताएका छन् ।
पीडित बालिकाले दुधौली नगरपालिकाकै एक होटलमा काम गर्ने क्रममा नगरप्रमुखबाट आफू माथि बलात्कार भएको उजुरीमा उल्लेख छ । आर्थिक र सामाजिक दबाबका कारण सुरुमा चुप बस्न बाध्य भएको परिवारको दाबी छ ।
