पोखरा । राम्रो तलबसहित होटलमा काम लगाइदिने प्रलोभन देखाएर महिलाहरूलाई जबरजस्ती यौन कार्यमा लगाएका २ जनालाई मंगलबार कास्की प्रहरीले पक्राउ गरेको छ ।
जबरजस्ती अनैतिक कार्यमा लगाइएका ४ महिलालाई पनि उद्धार गरिएको प्रहरीले जनाएको छ।
पक्राउ पर्नेमा भारत घर भई हाल पोखरा महानगरपालिका १४ चाउथे बस्ने २४ वर्षीय राधे श्याम शाह र बागलुङको काठेखोला गाउँपालिका ४ घर भई पोखरा १ बगर बस्ने २८ वर्षीय खेमु थापा छन् । उनीहरूलाई पोखरा ८ जाल्पारोडबाट पक्राउ गरिएको हो ।
खाजा घरहरूमा अनैतिक गतिविधि भइरहेको भन्ने गोप्य सूचनाको आधारमा प्रहरी टोली खटिएको थियो । जिल्ला प्रहरी कार्यालय कास्की र वडा प्रहरी कार्यालय बैदामबाट खटिएको संयुक्त टोलीले छापा हानेको हो ।
आर्थिक अवस्था कमजोर भएका महिलाहरूलाई खोजेर यौन कार्यमा लगाउने गरेको प्रारम्भिक रिपोर्टले देखाएको छ ।
उनीहरूले महिलाहरूलाई खानबस्नको सुविधासहित राम्रो तलबमा होटलको काममा लगाइदिने भन्दै फकाउने र पछि होटलमा आउने पुरुषसँग पैसा लिएर अनैतिक कार्यमा लगाउने अनुसन्धानबाट खुलेको कास्की प्रहरीका प्रवक्ता डीएसपी हरीबाहादुर बस्नेतले जानकारी दिए ।
पक्राउ परेका दुवै जनालाई कास्की जिल्ला अदालतबाट मानव बेचबिखन तथा ओसारपसार सम्बन्धी कसुरमा ७ दिनको म्याद थप गरी अनुसन्धान प्रक्रिया अगाडि बढाइएको उनले बताए।
