गायिका एलिना चौहानले एउटा गम्भीर तस्बिर सार्वजनिक गरेकी छन् । उनले सामाजिक सञ्जाल फेसबुकमार्फत आफू हिंसाको सिकार भएको प्रस्ट हुने तस्बिर सार्वजनिक गरेकी हुन् ।
केही पहिले नै पति विष्णु सापकोटासँग सम्बन्धबिच्छेद गरेकी एलिनाले ९ जुन २०२४ को उक्त तस्बिर सार्वजनिक गरेकी हुन् ।
उनले सार्वजनिक गरेको तस्बिरमा यातनाले गालाभरी नीलडाम भएको देखिन्छ ।
शुक्रबार फेसबुकमा लामो स्ट्याटस लेख्दै उनले अब चुप नलाग्ने र यो हरेक नेपाली चेलीको आवाज भएको बताएकी छन् ।
आजै सापकोटाले आफू मानसिक पीडाबाट गुज्रिरहेका बताएका थिए ।
गायिका एलिनाले लेखेकी छिन् –
हामीबीचको कुरा त आपसी समझदारीमै त्यही दिन सकिएको थियो।
तर समाजकै दवाव, सामाजिक सञ्जालको दुरुपयोग, र सतही धारणाले
त्यो सकिएको कुरा फेरि दोहोर्याएर मेरो व्यक्तिगत जीवनमाथि गम्भीर अन्याय गर्यो।
म कानुनी प्रक्रियामा जान बाध्य भएँ।
म आफ्नो चरित्रको बचाउ गर्न बाध्य भएँ।
मैले मेरो विगत खोल्नुपर्यो—त्यो विगत जुन आज मेरो जीवनसँग सम्बन्धित छैन।
त्यो सम्बन्धसँग मेरो कुनै दुश्मनी थिएन,
न कुनै बदला लिने सोच।
स्पष्ट भन्न चाहन्छु—
यो लडाइँ मेरो व्यक्तिगत मान्छेसँग होइन।
यो लडाइँ हो—त्यस मानसिकतासँग,
जसले सत्य बोल्ने नारीलाई नै दोषी बनाउँछ।
जसले पीडितलाई नै कठघरामा उभ्याउँछ।
जब मैले आफ्ना भोगाइहरू सुनाएँ,
म माथि फेरि प्रश्नहरू उठाइए—‘किन अहिले?’, ‘किन फेरि?’
तर मलाई थाहा छ—यो देश अझै पनि पुरुषप्रधान सोचमा जकडिएको छ।
यहाँ सत्य बोल्नेलाई नै अपराधी बनाइन्छ।
तर अब म चुप लाग्दिन।
अब यो केवल मेरो न्यायको लडाइँ होइन,
यो हरेक नेपाली चेलीको आवाज हो।
म हरेक कानुनी, सामाजिक र नैतिक बाटो अपनाएर
न्यायका लागि अगाडि बढ्नेछु।
किनकि म एक्लो भए पनि,
सत्य मेरो साथमा छ।
