के तपाईंले कहिल्यै सुन्नुभएको छ एउटा अण्डा २५ हजार रुपैयाँमा बिक्न सक्छ भन्ने ?
भारतको लेहका उपत्यकाहरूमा मानवताको यस्तै एउटा उदाहरणले यसको पुष्टि गरेको छ । जसले विश्व नै चकित बनाइदिएको छ । खासमा इरानका युद्ध प्रभावित निर्दोष बालबालिकालाई मद्दत गर्न यहाँका मानिसहरूले आफ्ना ढुकुटी र मन दुवै खोलेका हुन् । लद्दाखको कठ्याङ्ग्रिने जाडोमा लेहका जनताले आफ्नो उदारताले सारा संसारमा न्यानोपन फैलाइदिएका छन् ।
इरान र अमेरिकाबिच चलिरहेको युद्धकाबिच त्यहाँका निर्दोष बालबालिका र परिवारहरूको मद्दतका लागि लेहमा हालै एक विशेष लिलामी आयोजना गरिएको थियो । यस लिलामीको अवस्था यस्तो थियो कि बजारमा केवल १० रुपैयाँ पर्ने अण्डाका लागि शब्बीर हुसेन नामक एक व्यक्तिले खुसीसाथ २५ हजार रुपैयाँ (भारु) को बोली लगाए ।
एक कुखुरा सवा लाख रुपैयाँमा किनियो
अन्जुमन इमामिया र मजलिस–ए–उलेमा लेहको यस अभियानमा मानिसहरूले सामान मात्र होइन, आफ्ना भावनाहरू पनि दान गरेका थिए । शब्बीर हुसेनले यो पैसा कुनै धनको प्रदर्शनका लागि नभई, इरानमा अत्याचार सहिरहेका बालबालिकाको पीडा कम गर्नका लागि दिएको बताए । लेहको बजारमा जब यस अण्डाको लिलामी भयो, तब सबै छक्क परेका थिए । यो केवल एउटा अण्डा थिएन, बरु एक समुदायको आफ्ना नेताप्रति विश्वास र पीडितहरूप्रति प्रेम थियो ।
यसअघि कारगिलको त्रेसापोन क्षेत्रमा पनि यस्तै दृश्य देखिएको थियो, जहाँ दानमा प्राप्त एक कुखुरालाई सवा लाख रुपैयाँमा किनिएको थियो । त्यहाँ पनि एउटा अण्डा ६ हजार रुपैयाँमा बिक्री भएको थियो । आइतबार भएको यस लिलामीमा अण्डा वा कुखुरा मात्र नभई, मानिसहरूले आफ्ना गरगहना, बहुमूल्य कपडा र फर्निचरसम्म दान गरेका थिए । आयोजकहरूले यो क्रम अहिले नरोकिने बताएका छन् ।
आउँदो शुक्रबार र आइतबार फेरि यस्तै लिलामीहरू आयोजना गरिने बताइएको छ, ताकि धेरैभन्दा धेरै मद्दत जुटाउन सकियोस् ।
